Hum Khak Hain Aur Khak Hi

ہم خاک ہیں اور خاک ہی مَاوا ہے ہمارا خاکی تو وہ آدم جَد اَعلیٰ ہے ہمارا

اللہ ہمیں خاک کرے اپنی طلب میں یہ خاک تو سرکار سے تمغا ہے ہمارا

جس خاک پہ رکھتے تھے قدم سیِّد عالم اُس خاک پہ قرباں دلِ شیدا ہے ہمارا

More Lyrics, Less Storage - Install the App and Ditch the Screenshots!

خم ہو گئی پشتِ فلک اس طعنِ زَمیں سے سن ہم پہ مَدینہ ہے وہ رتبہ ہے ہمارا

اس نے لقبِ خاک شہنشاہ سے پایا جو حیدرِ کرّار کہ مولیٰ ہے ہمارا

اے مدّعیو! خاک کو تم خاک نہ سمجھے اس خاک میں مدفوں شہِ بطحا ہے ہمارا

ہے خاک سے تعمیر مزارِ شہِ کونین معمور اِسی خاک سے قبلہ ہے ہمارا

ہم خاک اڑائیں گے جو وہ خاک نہ پائی آباد رضاؔ جس پہ مدینہ ہے ہمارا