Hajj Ke Asbab Aaqa

Hajj ke asbaab Aaqa bana do Mujh ko meetha Madinah dikha do

Mujda-e-jaan faza ab suna do Soi taqdeer meri jaga do

Apne jalwe nazar mein basa do Mera seenah Madinah bana do

Hajj karoon phir Madine mein aaon Yeh sharaf ya Habib-e-Khuda do

Jhoom kar gird-e-Ka'bah phiroon main Yeh sa'adat Khuda se dila do

Apne mehrab-o-mimbar ka dar ka Sabz gumbad ka jalwah dikha do

Khoob Makkah ki galiyon mein ghoomoon Ab Mina ki baharein dikha do

Mujh ko Arafat ke bhi manazir Az paye Ghous-e-Azam dikha do

Hijr-e-Tayyabah mein jo khoob royein Aisi aankhein paye Murtaza do

Gham-e-Madine ka aur be-qarari Az paye Shah-e-Karbala do

Aakhiri din meri umr ke hain Mera maskan Madinah bana do

Kaash! qadmon mein aaye mujhe maut Mera madfan Madinah bana do

Dam nikalne ki jaan soz ghariyan Aa gayi, aake kalima parha do

Meri mayyat pe Shah-e-Madinah! Apni rehmat ki chadar urha do

Ho Baqi-e-Mubarak mein tadfeen Yeh sharaf az paye Fatimah do

Qabr mein ghup andhera hai chhaya Aake Mah-e-Arab! jagmaga do

Garmi-e-hashr se muztarib hoon Jaam-e-Kauthar Khudara pila do

Ho gunahgar par chashm-e-rehmat Apne Allah se bakhshwa do

Aah! Dozakh ka haq-dar hoon main Rabb ki rehmat se Jannat dila do

No Internet? No Problem! Get the App for Offline Lyrics!

Do shifa har badi ke marz se Nekiyan karne wala bana do

Saare roohani jismani amraz Door hon, sehat-e-kamilah do

Mere gham rahaton se badal kar Dil ki murjhayi kaliyan khila do

Ho sada Rabb ki rehmat ka saaya Ya Nabi! tum mujhe yeh dua do

Bolta hoon bohat tum zaban ka Mujh ko qufl-e-Madinah shaha do

Nazrein jhukti nahi hain, nazar ka Mujh ko qufl-e-Madinah shaha do

Hajj kare har baras kaash! Attar Yeh sa'adat Rasool-e-Khuda do