Hajiyo Aao Shehanshah Ka

Haajiyo! Aao Shahanshah ka rauzah dekho Ka'bah to dekh chuke Ka'bah ka Ka'bah dekho

Rukn-e-Shami se miti wehshat-e-shaam-e-ghurbat Ab Madinah ko chalo subh-e-dil-aara dekho

Aab-e-Zamzam to piya khoob bujhaayin pyaasein Aao jood-e-Shah-e-Kausar ka bhi dariya dekho

Zer-e-Meezab mile khoob karam ke chheinte Abr-e-rehmat ka yahan zor barasna dekho

Dhoom dekhi hai dar-e-Ka'bah pe betabon ki Un ke mushtaqon mein hasrat ka tadapna dekho

Download Lyrics & Access Offline - Install Our App Now!

Misl-e-parwanah phira karte the jis sham'a ke gird Apni us sham'a ko parwanah yahan ka dekho

Khoob aankhon se lagaya hai ghilaaf-e-Ka'bah Qasr-e-mehboob ke parde ka bhi jalwa dekho

Waan muti'on ka jigar khauf se paani paaya Yaan siyah-karon ka daaman pe machalna dekho

Awwaleen khanah-e-Haq ki to ziyaaein dekhein Aakhareen bait-e-Nabi ka bhi tajalla dekho

Zeenat-e-Ka'bah mein tha laakh arooson ka banao Jalwa-farma yahan kaunain ka dulha dekho

Aiman-e-Toor ka tha Rukn-e-Yamani mein farogh Shu'la-e-Toor yahan anjuman-aara dekho

Mehr-e-madar ka maza deti hai aaghosh-e-Hateem Jin pe maa-baap fida yaan karam un ka dekho

Arz-e-haajat mein raha Ka'bah kafeel-e-injaah Aao ab daad-rasi-e-Shah-e-Taibah dekho

Dho chuka zulmat-e-dil bosah-e-sang-e-aswad Khaak-bosi-e-Madinah ka bhi rutba dekho

Kar chuki rif'at-e-Ka'bah pe nazar parwaazein Topi ab thaam ke khaak-e-dar-e-wala dekho

Be-niyaazi se wahan kaanpti paayi taa'at Josh-e-rehmat pe yahan naaz-e-gunah ka dekho

Jumu'ah-e-Makkah tha eid ahl-e-ibadat ke liye Mujrimo! aao yahan eid-e-doshanbah dekho

Multazim se to gale lag ke nikaale armaan Adab-o-shauq ka yaan baaham ulajhna dekho

Khoob Mas'a mein ba-umeed-e-safa daud liye Reh-e-jaanaan ki safa ka bhi tamasha dekho

Raqs-e-bismil ki bahaarein to Mina mein dekhein Dil-e-khoonaba-fishaan ka bhi tadapna dekho

Ghaur se sun to Raza Ka'bah se aati hai sada Meri aankhon se mere pyaare ka rauzah dekho