Firaq e Madina Main Dil Ro Raha Hai

Firaq-e-Madinah mein dil ro raha hai Jigar tukre tukre hua ja raha hai

Meri aankh se cheena Taiba ka manzar Main kis baat ka tu ne badla liya hai

Dikhaya hai din yeh muqaddar ne mujh ko Na shikwa kisi se na koi gila hai

Mere dil ke armaan rahe dil hi dil mein Yahi gham mere dil ko tarpa raha hai

Sukoon tha mujhe kucha-e-Mustafa ﷺ mein Watan mein mera sab sukoon lut gaya hai

Na duniya ki fikrein na gham tha wahan par Yahan aake dil aafaton mein phansa hai

Main lafzon mein kaise bata doon kisi ko Ke kya kya mujhe aaj yaad aa raha hai

Paharon ki dilkash qataron ke jalwe Woh manzar mujhe yaad aa raha hai

Unhein choomna haath lehra kar paiham Woh lamha mujhe yaad aa raha hai

Aqeedat se khaak-e-Madinah utha kar Use choomna aaj yaad aa raha hai

Kabhi chalte chalte utha kar tinke Saja lena daarhi mein yaad aa raha hai

Kabhi deed-e-Sarwar ki hasrat mein mimbar Ko takna woh chup chup kar yaad aa raha hai

Haseen woh pyari woh jannat ki kyari Wahan baithna aaj yaad aa raha hai

Kabhi dekh kar sabz gumbad ka manzar Jhukana nazar aaj yaad aa raha hai

Never Be Without Your Favorite Lyrics - Get the App for Offline Access!

Kabhi haazri ke liye ghar se chal kar Kare hona qadmon mein yaad aa raha hai

Kabhi rote rote kabhi dil hi dil mein Sunana unhein haal yaad aa raha hai

Madine se main door aa kar para hoon Yeh jeena bhi kya jeena bhala hai

Bichhar kar Ubaid Raza tere dar se Pareshan hai khwaar hai ghamzada hai

Bula lo Ubaid Raza ko bula lo Agarcha nikamma hai magar woh tera hai