Dil Se Mere Dunya Ki Muhabat

Dil se mere dunya ki mohabbat nahi jaati Sarkar! gunahon ki bhi aadat nahi jaati

Din raat musalsal hai gunahon ka tasalsul Kuch tum hi karo na yeh nahoosat nahi jaati

Khane ki ziyadat hai to sone ki bhi kasrat Aur khandah-e-beja ki bhi khaslat nahi jaati

Go pesh-e-nazar qabr ka pur-haul garha hai Afsos! magar phir bhi yeh ghaflat nahi jaati

Ae Rahmat-e-Konain! kamine pe karam ho Haye! nahi jaati buri khaslat nahi jaati

Jee chahta hai phoot ke roon tere gham mein Sarkar! magar dil ki qasawat nahi jaati

Kya ho gaya Sarkar! khayalon ko hamare Aghyar ke fashion ki nahoosat nahi jaati

Go lakh bura hi sahi mayoos nahi hoon Sad shukr ke umeed-e-shafa'at nahi jaati

Aadat mujhe maloom hai Aaqa ki kisi ka Dil tod ke jaati nahi rahmat nahi jaati ’’ Apnon‘‘ ko to Sarkar! tabahi se bacha lo Becharon ke seenon se adawat nahi jaati

Free Up Space - Get Lyrics Without Bulky Screenshots!

Allahu Ghani! shan-e-Wali! raaj dilon par Dunya se chale jayen hukumat nahi jaati

Kuch aisi kashish tujh mein hai ae shahr-e-Madinah! Go haziri sau baar ho hasrat nahi jaati

Nairangi-e-dunya ke tamashon ki khabar hai Attar! tu kyun dil se yeh ulfat nahi jaati