Dil Ko Sukoon Chaman Mein

Dil ko sukoon chaman mein na hai lala-zaar mein Soz-o-gudaaz hai faqat un ke diyaar mein

No Internet? No Problem! Get the App for Offline Lyrics!

Ya Mustafa bulaiye apne diyaar mein Sarkar! aaun Taibah ke phir lala-zaar mein

Har saal ya Ilahi mujhe Hajj naseeb ho Jab tak jiyun main aalam-e-na-paidaar mein

Har saal haziri ho Madine ki khair se Har saal kaash! aaun main tere diyaar mein

Soz-e-Bilal do mujhe soz-e-Bilal do De sakte ho tumhare toh hai ikhtiyar mein

Ya Rabb! gham-e-Habib mein rona naseeb ho Aansoo na raaigaan hon gham-e-rozgar mein

Afsos ghat-ti ja rahi hai roz zindagi Par main daba hi jaata hoon isyaan ke baar mein

Tujh ko Hasan Husain ka deta hoon wasita Allah! maut de mujhe un ke diyaar mein

Kuch roz pehle toh main, Madine mein tha ab aah! Aakar watan mein phans gaya phir karobar mein

Hijr-e-Madinah mein jo tarapte hain Ya Nabi Un ko bulaiye Shaha! apne diyaar mein

Kar maghfirat meri teri rahmat ke saamne Mere gunah ya Khuda hain kis shumaar mein

Fazl-e-Khuda se maalik-e-kon-o-makaan hain aap Dono jahan aap ke hain ikhtiyar mein

Fashion ko choro bhaiyo! apnao sunnatein Kab tak jiyo ge aalam-e-na-paidaar mein

Woh deen-e-haq ke waste Taif mein zakhm khayein Afsos hum phanse rahein bas karobar mein

Badkaar-o-naabakaar ka imaan Ya Nabi Mehfooz rakhna aap ke hai ikhtiyar mein

Karte raho yeh haq se dua mere bhaiyo! Attar ko de maut Nabi ke diyaar mein

Saara andhera door samaan ho ga noor noor Attar jab woh aayein ge tere mazaar mein