Chal Raha Hai Muhammad Ki

Jal raha hai Muhammad ﷺ ki dehleez par, dil ko taaq-e-haram ki zaroorat nahi Mere aaqa ke mujh par hain itne karam ab kisi ke karam ki zaroorat nahi

No More Screenshots! Save Storage with Our Lyrics App!

Har tulu-e-sehar jin ke saaye tale, jin ki aahat se nabz-e-do aalam chale Un ke qadmon se lag kar hoon baitha hua mujh ko jaah-o-hasham ki zaroorat nahi

Husn-e-khallaq-e-kon-o-makan dekh loon, jo na dekha kabhi wo samaan dekh loon Mujh ko aaina-e-Mustafa chahiye pattharon ke sanam ki zaroorat nahi

Door se aane wali us aawaaz par, mar mitoon jis mein ho ishq-e-khair-ul-bashar ﷺ Soo-e-khair-ul-bashar jo na le kar chale, us nishan-e-qadam ki zaroorat nahi

Meri har saans ishq-e-Nabi mein dhale, yeh wo sikka hai uqba mein bhi jo chale Sirf dunya mein jo kharch ki ja sake mujh ko aisi raqam ki zaroorat nahi

Kuch na karni padegi talafi mujhe, mil hi jayegi Haq se maafi mujhe Ishq-e-Shah-e-Payambar hai kaafi mujhe rakht-e-rah-e-adam ki zaroorat nahi

Ka’b-o-Hassan ke saath layenge woh meri bakhshish Muzaffar karayenge woh Main Habeeb-e-Khuda ka parastar hoon mujh ko mehshar ke gham ki zaroorat nahi