Buraq Fikr Hai

Buraq-e-fikr hai gardoon navard aaj ki raat Hawa urati hai taaron ki gard aaj ki raat

Yeh kaun zehan ke roshan makaan mein utra Khayal surat-e-Jibreel dhiyaan mein utra

Hai khum, rasai-e-insaan pe faaslon ki jabeen Bulandiyon pe kamandein uchalti hai zameen

Yeh raat kyun na ho afzal tamaam raaton mein Liye huye hain andhere charagh hathon mein

Woh raat, jis ka zamana jawab la na sake Milaye aankh toh suraj bhi taab la na sake

Woh raat jis ne haseen khwab jaag kar dekha Woh raat jis ne Muhammad ﷺ ko arsh par dekha

Gaya tha ishq, khalaon ki raah se aage Nigah jaati hai hadd-e-nigah se aage

No Internet? No Problem! Get the App for Offline Lyrics!

Ruki ruki nazar aati thi nabz-e-aalam ki Guzar rahi thi sawari Rasool-e-Akram ﷺ ki

Rawaan thay saath farishtay aba uthaye huye Fazayein, kutba-e-Salli Ala uthaye huye

Urooj-e-adamiyat aap par tamaam hua Khuda khud apne hi jalwon se humkalam hua

Tajalliyat ke haalay mein yun ghiray dono Kamaan-e-wasl khinchi, mil gaye siray dono

Buland aise na rutbay kisi Nabi ke huye Zahay naseeb ke hum ummati usi ke huye