Aye Kash Phir Madine Mein

Ae kaash! phir Madine mein Attar ja sake Ro ro ke haal Shah ko apna suna sake

Pichhle baras to hazir-e-dar ho gaya tha aah Is saal kaash Hajj ka sharaf phir se pa sake

Ya Rabb-e-Mustafa! koi aisa sabab bana Saaye mein maut Gumbad-e-Khizra ke aa sake

Taibah bula, ya woh dil-e-ghamgeen de mujhe Dil se na tera gham koi mere mita sake

Why Screenshot When You Can Download? Get the App for Efficient Storage!

Ya Rabb paye Raza mujhe woh aankh de ki jo Ishq-e-Rasool-e-Pak mein aansu baha sake

Woh aag mere seene mein Aaqa lagaiye Patthar se sakht qalb ko bhi jo jala sake

Sarkar chaar yaar ka deta hoon wasita Aisi bahaar do na khizaan paas aa sake

Dushman agarcha ghaat mein hai koi gham nahin Un ki madad rahe to bigaar apna kya sake

Chashm-e-karam ho aisi ki mit jaaye har khata Koi gunah mujh se na Shaitan kara sake

Hai sabr to khazana-e-Firdous bhaiyo Aashiq ke lab pe shikwa kabhi bhi na aa sake

Jis waqt sunnaton ka main karne lagoon bayaan Aisa asar ho paida jo dil ko hila sake

Meri zabaan mein woh asar de Khudaye Pak Jo Mustafa ke ishq mein sab ko rula sake

Attar tere haami-o-nasir hain Mustafa Kis ki majaal hai ki jo tujh ko daba sake