Ajab Suroor Sada Uska

Ajab suroor-e-sada us ka dhyan deta hai Bilal Ka'bay mein goya azan deta hai

Jalaye dhoop mujhe jab mray gunahon ki Durood abr ki chadar si taan deta hai

Mri talab hai usi ke karam se wabasta Jo ek waqt mein donon jahan deta hai

Zahay naseeb mayassar hai us ka pyar mujhe Jo dushmanon ko bhi apne aman deta hai

Nishan-e-pa bhi hain us ke, urooj ka zeena Zameen nasheen ko woh aasman deta hai

More Lyrics, Less Storage - Install the App and Ditch the Screenshots!

Kare shikar jo dil ko baghair teeron ke Usi ke hath mein apni kaman deta hai

Jo apne pait se faqon mein bandh kar patthar Zaeef ko bhi iraday jawan deta hai

Karon jo yaad usay sab kasafatein mit jayen Khayal us ka aqeeday ko chhan deta hai

Mray kalam ko shohrat bhi de raha hai wahi Jo patharon ko Muzaffar zaban deta hai