Afsos Bohut Door Hun

Afsoos! Bahut door hoon gulzar-e-Nabi se Kash aaye bulawa mujhe darbar-e-Nabi se

Ulfat hai mujhe gesu-e-khamdar-e-Nabi se Abru-o-palak aankh se rukhsar-e-Nabi se

Pairahan-o-chadar se asa se hai mohabbat Nalain-e-shareefain se dastar-e-Nabi se

Busiri! Mubarak ho tumhein burd-e-Yamani Sughat mili khoob hai darbar-e-Nabi se

Beemar! na mayoos ho tu husn-e-yaqeen rakh Dam ja ke karale kisi beemar-e-Nabi se

Tu khwab mein Hasnain ke sadqe mein khudaya Farma de musharraf mujhe deedar-e-Nabi se

Allah ko maane jo Muhammad ko na maane La-raib woh nari hua inkar-e-Nabi se

Woh nar-e-Jahannam ka hai haqdar yaqeenan Hai jis ko adawat kisi bhi yaar-e-Nabi se

Download Lyrics & Access Offline - Install Our App Now!

Ae zaair-e-Taibah! yeh dua kar mere haq mein Mujh ko bhi bulawa mile darbar-e-Nabi se

Duniya ke nazaron se bhala kya ho sarokar Ushaaq ko bas ishq hai gulzar-e-Nabi se

Deewanon ke aansoo nahin thamte dam-e-rukhsat Jab su-e-watan jaate hain darbar-e-Nabi se

Jalwon se khudaya mira seena ho Madinah Aankhein bhi hon thandi meri deedar-e-Nabi se

Sunnat hai safar deen ki tableegh ki khatir Milta hai hamein dars yeh asfar-e-Nabi se

Mastana Madine mein Khuda aisa banade Takra ke main dam tod doon deewar-e-Nabi se

Sadqe mein mere Ghous ke ho door andhera Turbat ho munawwar meri anwar-e-Nabi se

Jab qabr mein aayenge to qadmon mein giron ga Khoob aankhein maloon ga main to paizar-e-Nabi se

Attar hai imaan ki hifazat ka sawali Khali nahin jaaye ga yeh darbar-e-Nabi se