Aaj Taiba Ka Hai Safar

Aaj Taibah ka hai safar Aaqa De do toshay mein chashm-e-tar Aaqa

Ghamzada hoon main kis qadar Aaqa Tum ko meri hai sab khabar Aaqa

Mujh ko bimariyon ne ghera hai Aap hain mere chara-gar Aaqa

Chand ashkon ke masiva pallay Kuch nahi tosha-e-safar Aaqa

Download Lyrics & Access Offline - Install Our App Now!

Taj-e-shahi ka main, nahi talib Kar do rehmat ki ik nazar Aaqa

Teri ulfat ka main bhikari hoon Mera kashkol jaye bhar Aaqa

Qalb-e-muztar do chashm-e-tar do aur Chak-e-seena tapan jigar Aaqa

Chal Madinah ka woh bhi lein muzdah Jin ke pallay nahi hai zar Aaqa

Kya amamay ki ho bayan azmat Tere na'lain taj-e-sar Aaqa

Tere hotay huay bhala kyun ho Waar dushman ka kargar Aaqa

Is tarah se chupa lo daman mein Na adu ki paray nazar Aaqa

Mu'tarif hoon gunah karne mein Koi chhori nahi kasar Aaqa

Phans gaya hoon gunah ki daldal mein Ho karam Shah-e-Bahr-o-Bar Aaqa

Main gunahgar hoon magar qurbaan Teri rehmat ki hai nazar Aaqa

Wasta mere Ghous-e-Azam ka Har khata kar do dar-guzar Aaqa

Tum usay bhi galay lagatay ho Jis ko dhutkaray har bashar Aaqa

Main jahannam mein gir gaya hota Na bachatay mujhe agar Aaqa

Kaash! neechi nazar rahay, be-kar Main na dekhun idhar udhar Aaqa

Jaan chhootay fazool baton se Az paye Hazrat-e-Umar Aaqa

Maula Mushkil-kusha ke sadqay mein Istaqamat do deen par Aaqa

Az paye murshidi Zia-ud-Din Mere dil mein banao ghar Aaqa

Kaash! is shaan se yeh dam niklay Teri dehleez par ho sar Aaqa

Izn de do Baqi-e-Gharqad ka Tere jalwon mein jaaun mar, Aaqa

Kya banay ga bajaye Taibah ke Sindh mein mar gaya agar Aaqa

Maut Attar ko Madine mein Aaye ab toh na jaye ghar Aaqa