Aaj Taiba Ka Hai Safar

آج طیبہ کا ہے سفر آقا دے دو توشے میں چشمِ تر آقا

غمزدہ ہوں میں کس قَدَر آقا تم کو میری ہے سب خبر آقا

مجھ کو بیماریوں نے گھیرا ہے آپ ہیں میرے چارہ گر آقا

چند اَشکوں کے ماسِوا پلّے کچھ نہیں تَوشۂ سفر آقا

تاجِ شاہی کا میں ، نہیں طالِب کردو رحمت کی اِک نظر آقا

تیری الفت کا میں بھکاری ہوں میرا کشکول جائے بھر آقا

قلبِ مُضطَر دو چشمِ تر دو اور چاک سینہ تَپاں جگر آقا

چل مدینہ کا وہ بھی لیں مُثردہ جن کے پلّے نہیں ہے زَر آقا

کیا عمامے کی ہو بیاں عظمت تیرے نعلین تاجِ سر آقا

تیرے ہوتے ہوئے بھلا کیوں ہو وار دُشمن کا کارگر آقا

اِس طرح سے چھپا لو دامن میں نہ عَدو کی پڑے نظر آقا

مُعترِف ہوں گناہ کرنے میں کوئی چھوڑی نہیں کسر آقا

پھنس گیا ہوں گنہ کی دلدل میں ہو کرم شاہِ بحروبر آقا

میں گنہگار ہوں مگر قرباں تیری رحمت کی ہے نظر آقا

واسِطہ میرے غوثِ اعظم کا ہر خطا کر دو در گزر آقا

تم اُسے بھی گلے لگاتے ہو جس کو دُھتکارے ہر بشر آقا

میں جہنَّم میں گِر گیا ہوتا نہ بچاتے مجھے اگر آقا

کاش! نیچی نظر رہے، بے کار میں نہ دیکھوں اِدھر اُدھر آقا

جان چُھوٹے فُضُول باتوں سے از پئے حضرت عمر آقا

مولٰی مشکلکشا کے صدقے میں استِقامت دو دِین پر آقا

ازپئے مرشِدی ضِیاء الدّین میرے دل میں بناؤ گھر آقا

کاش! اِس شان سے یہ دم نکلے تیری دَہلیز پر ہو سر آقا

اِذن دیدو بقیعِ غَرَقد کا تیرے جلووں میں جاؤں مَر، آقا

کیا بنے گا بجائے طیبہ کے سندھ میں مر گیا اگر آقا

موت عطارؔ کو مدینے میں آئے اب تو نہ جائے گھر آقا