Zindagi Abu Bakar Ki

Zindagi Abu Bakr ki hukm-e-Khuda ke sath hai Badr-o-ghaar-o-qabr mein woh Mustafa ﷺ ke sath hai

Pusht-e-hashtam mein Muhammad ﷺ se mile iska nasab Sadiyon se woh rahmat-e-arz-o-sama ke sath hai

Kunniyat Abu Bakr hai Siddiq hai iska laqab Ya'ni Abdullah habib-e-Kibriya ke sath hai

Sab se pehle hath rakha Mustafa ﷺ ke hath par Sachi khamoshi bhi Quran-e-sada ke sath hai

Pak tha kirdar iska qabl az Islam bhi Roshni ka mustahiq Noor-ul-Huda ke sath hai

Sar pe rakh laya hai ghar mein jo bhi kuch saman tha Har khushi uski Muhammad ﷺ ki raza ke sath hai

Hukm-e-Aqa ﷺ se kiya farz-e-imamat bhi ada Aap ki har ek ada iski ada ke sath hai

Chun liya ba'd-e-Nabi ﷺ pehla khalifa aap ko Aap ka rasta Nabi ﷺ ke naqsh-e-pa ke sath hai

Umr bhi Siddiq ne payi tirsath saal ki Arsa-e-anfas bhi Khair-ul-Wara ke sath hai

No Internet? No Problem! Get the App for Offline Lyrics!

Maut ki manzil ne bhi tanha nahi chora use Waqt se bichra hua lamha baqa ke sath hai

Un ke pay-e-naz se wabasta hai woh aaj bhi Jinke niche ki zameen arsh-e-ala ke sath hai

Daman-e-mazi mein dhundo aane wale daur ko Jo bhi uske sath hai woh irtiqa ke sath hai

Meri khush bakhti ki Siddiqi Muzaffar mein bhi hoon Aaqibat meri bhi jannat ki hawa ke sath hai