Zindagi Abu Bakar Ki

زندگی بوبکرکی حکم خدا کے ساتھ ہے بدر و غار و قبر میں وہ مصطفےؐ کے ساتھ ہے

پشت ہشتم میں محمدؐ سے ملے اس کا نسب صدیوں سے وہ رحمت ارض و سما کے ساتھ ہے

کنیت بوبکر ہے صدیق ہے اس کا لقب یعنی عبداللہ حبیب کبریا کے ساتھ ہے

Why Screenshot When You Can Download? Get the App for Efficient Storage!

سب سے پہلے ہاتھ رکھا مصطفےؐ کے ہاتھ پر سچی خاموشی بھی قرآن صدا کے ساتھ ہے

پاک تھا کردار اس کا قبل از اسلام بھی روشنی کا مستحق نور الہدا کے ساتھ ہے

سر پہ رکھ لایا ہے گھر میں جو بھی کچھ سامان تھا ہر خوشی اسکی محمدؐ کی رضا کے ساتھ ہے

حکم آقاؐ سے کیا فرض امامت بھی ادا آپ کی ہر اک ادا اسکی ادا کے ساتھ ہے

چن لیا بعد نبیؐ پہلا خلیفہ آپ کو آپ کا رستہ نبیؐ کے نقش پا کے ساتھ ہے

عمر بھی صدیق نے پائی تریسٹھ سال کی عرصہء انفاس بھی خیر الورا کے ساتھ

موت کی منزل نے بھی تنہا نہیں چھوڑا اسے وقت سے بچھڑا ہوا لمحہ بقا کے ساتھ ہے

ان کے پائے ناز سے وابستہ ہے وہ آج بھی جنکے نیچے کی زمیں عرش علا کے ساتھ ہے

دامن ماضی میں ڈھونڈو آنے والے دور کو جو بھی اسکے ساتھ ہے وہ ارتقا کے ساتھ ہے

میری خوشی بختی کہ صدیقی مظفر میں بھی ہوں عاقبت میری بھی جنت کی ہوا کے ساتھ ہے