Suniyon Ke Dil Mein

Sunniyon ke dil mein hai izzat Waqar-ud-Din ki Aaj bhi mamnoon hai millat Waqar-ud-Din ki

Aap Allamah o mufti aur the Shaikh-ul-Hadith Aaj bhi hai qalb mein azmat Waqar-ud-Din ki

Sirf aalim hi nahi the aap aalim-gar bhi the Marhaba thi khoob ilmiyat Waqar-ud-Din ki

Be-adad ulama ne zanoo-e-talammuz tah kiye Kya bayaan ho shaan-e-ilmiyat Waqar-ud-Din ki

InshaAllah kaam aayegi mujhe roz-e-jaza Qadr-dani ilm ki ulfat Waqar-ud-Din ki

InshaAllah woh baroz-e-hashr bakhsha jayega Jis ko haasil ho gayi nisbat Waqar-ud-Din ki

Woh mujassam aajizi the aur sarapa saadagi Is liye to dil mein hai haibat Waqar-ud-Din ki

Charpai aur takiya aur lota janamaz Thi sarapa saada hi teenat Waqar-ud-Din ki

Charpai par woh hote aur hum bhi rubaru Yaad aati hai hamein sohbat Waqar-ud-Din ki

Aaye din khidmat mein aakar hum masail poochte Yaad aati hai hamein sohbat Waqar-ud-Din ki

Nukta-dani, mooshigafi aur gul-afshaniyan Yaad aati hai hamein sohbat Waqar-ud-Din ki

Khanda-peshani tabassum-rez meethi guftagu Yaad aati hai hamein sohbat Waqar-ud-Din ki

Un ko seene se lagaya Mustafa ﷺ ne khwab mein Qabil-e-sad-rashk hai qismat Waqar-ud-Din ki

Your Lyrics, Even Offline - Install the App for Free!

Bandah-e-badkar hoon! Afsos main bekar hoon Kuch na mujh se ho saki khidmat Waqar-ud-Din ki

Sab mureedon ke liye saare muhibbon ke liye Saniha-e-jaan-soz tha rihlat Waqar-ud-Din ki

Aakhiri deedar ke waqt aankh meri ro padi Dekh kar zer-e-kafan surat Waqar-ud-Din ki

Ya-Ilahi! Wasta tujh ko Rasool-e-Pak ka ﷺ Noor se mamoor kar turbat Waqar-ud-Din ki

Wasta Ghous o Raza ka ae Khudaye Mustafa ﷺ Khwab mein mujh ko dikha surat Waqar-ud-Din ki

Un ke faiz-e-khaas se Attar bhi hai faizyab Is pe kuch zaid hi thi shafqat Waqar-ud-Din ki

Tu to hai Attar bad-atwar, woh aali-waqar Kya likhega manqabat Hazrat Waqar-ud-Din ki