Khalq Pe Lutf e Khuda

خلق پہ لطفِ خدا حضرتِ عثمان ہیں جملہ مرض کی دَوا درد کے درمان ہیں

دستِ شہِ دوسرا جو کہ یَدُ ا للّٰہ تھا ہاتھ بنا آپ کا آپ وہ ذِی شان ہیں

نورِ دِل و عین ہیں صاحبِ نورَین ہیں سب کے دل کے چین ہیں مومنوں کی جان ہیں

گلشنِ دِین کی بہار مومنوں کے تاجدار عزتِ ہر ذِی وَقار زینتِ ایمان ہیں

آپ ممدوحِ جہاں خلقِ خدا مَدح خواں کیا ہے اَگر بدگماں چند بے ایمان ہیں

حق نے وہ رتبہ دیا تم غنی ہم سب گدا کیا کہوں میں تم ہو کیا عقل ودل حیران ہیں

Get Lyrics On-The-Go! Download Our App Now!

جو ہیں اِمامِ اَنام جس کے ہیں ہم سب غلام مرجعِ ہر خاص و عام حضرتِ عثمان ہیں

بابِ سخا کھل گیا دیکھا جو یہ ماجرا غازیانِ مصطفیٰ بے سروسامان ہیں

تم غنی سالکؔ گدا اِک نظر بہرِ خدا آپ جہاں کے لیے رحمتِ رحمٰن ہیں