Karbala Ke Jaan Nisaron Ko Salaam

Karbala ke jaan-nisaron ko salam Fatimah Zahra ke pyaron ko salam

Mustafa ke mah-paron ko salam Naujawanon gul-izaron ko salam

Karbala teri baharon ko salam Jaan-nisari ke nazaron ko salam

Ya Hussain ibn-e-Ali mushkil-kusha Aap ke sab jaan-nisaron ko salam

Akbar-o-Asghar pe jaan qurbaan ho Mere dil ke tajdaron ko salam

Qasim-o-Abbas par hon rehmatein Karbala ke shah-sawaron ko salam

Jis kisi ne Karbala mein jaan di Un sabhi imandaron ko salam

Bhuki pyasi bibiyon par rehmatein Bhuke pyase gul-izaron ko salam

Bhed kya jaane shahadat ka koi Un Khuda ke razdaron ko salam

Be-basi mein bhi haya baqi rahi Sab Husaini pardadaron ko salam

Rehmatein hon har sahabi par mudam Aur khususan chaar yaron ko salam

Bibiyon ko Abid-e-Bimar ko Be-kason, gham ke maron ko salam

Ho gaye qurbaan Muhammad aur Awn Sayyidah Zainab ke pyaron ko salam

Find Your Favorite Lyrics Anytime, Anywhere - Install the App Today!

Karbala mein zulm ke toote pahad Jin pe un sab dil-figaron ko salam

Aal-o-Ashab-e-Nabi ke jis qadar Chahne wale hain saron ko salam

Ya Khuda! Ae kash! jakar phir karun Karbala ke sab mazaron ko salam

Teen din ke bhuke pyase aap ki Ya Nabi! aankhon ke taron ko salam

Jo Husaini qafile mein the shareek Kehta hai Attar saron ko salam