We've added ads to help keep the platform running and improving for you. Learn More
کربلا کے جاں نثاروں کو سلام فاطِمہ زَہرا کے پیاروں کو سلام
مصطَفٰے کے ماہ پاروں کو سلام نوجوانوں گُلْ عِذاروں کو سلام
کربلا تیری بہاروں کو سلام جاں نثاری کے نظاروں کو سلام
یاحسین ابنِ علی مُشکل کُشا آپ کے سب جاں نثاروں کو سلام
اکبر و اصغر پہ جاں قربان ہو میرے دل کے تاجداروں کو سلام
قاسم و عبّاس پر ہوں رحمتیں کربلا کے شہَسُواروں کو سلام
جس کسی نے کربلا میں جان دی ان سبھی ایمانداروں کو سلام
بھوکی پیاسی بِیبیوں پر رحمتیں بھوکے پیاسیگُلْ عِذاروں کو سلام
بھید کیا جانے شہادت کا کوئی اُن خُدا کے رازداروں کو سلام
بے بسی میں بھی حیا باقی رہی سب حُسینی پردہ داروں کو سلام
رحمتیں ہوں ہر صحابی پر مُدام اور خُصُوصًا چار یاروں کو سلام
بیبیوں کو عابِدِ بیمار کو بے کسوں ، غم کے ماروں کو سلام
ہو گئے قرباں محمد اور عَون سیِّدہ زَینب کے پیاروں کو سلام
کربلا میں ظلم کے ٹوٹے پہاڑ جن پہ ان سب دلفِگاروں کو سلام
اٰل و اصحابِ نبی کے جس قَدَر چاہنے والے ہیں ساروں کو سلام
یاخدا! اے کاش! جاکر پھر کروں کربلا کے سب مزاروں کو سلام
تین دن کے بھوکے پیاسے آپ کی یانبی! آنکھوں کے تاروں کو سلام
جو حُسینی قافِلے میں تھے شریک کہتا ہے عطارؔ ساروں کو سلام
