Yun Toh Karte Hain Farishte Bhi Ibadat Teri

یوں تو کرتے ہیں فرشتے بھی عبادت تیری آئی انسان کے حصے میں نیابت تیری

تیرا آغاز بھی اب تک نہ کوئی جان سکا کون جانے کہ کہاں تک ہے نہایت تیری

انبیا ہی نے کرایا ہے تعارف تیرا انبیا ہی نے بیاں کی ہے روایت تیری

Why Screenshot When You Can Download? Get the App for Efficient Storage!

ہو سکا ارض و سما سے نہ تحمل جس کا آخر انساں نے سنبھالی ہے امانت تیری

مست رکھتا ہے سمندر کو تصور تیرا کوہ کو وجد میں لاتی ہے حکایت تیری

چاند، تارے ہیں ترے حُسن کا مظہر مولا! لالہ و گل سے نمایاں ہے نفاست تیری

تیری تسبیح کے خوگر ہیں پرندے سارے پتے پتے سے عیاں ہوتی ہے عظمت تیری

قلب کی آنکھ کھلی ہو تو پتہ چلتا ہے تیرا عرفان ہے کیا، کیا ہے حقیقت تیری

اپنی تسخیر کی کوشش میں لگا ہے کب سے چاہتا ہے ترا شہزاد حمایت تیری