Iltaja Kis Se Karun Tere Siwa

Iltija kis se karun tere siwa Ya Ilahi kar meri haajat rawa

Dard mera tujh se kuch pinhaan nahin Hai tera lutf-o-karam us ki dawa

Fazl se apne mujhe kar de ghani Tu ghani hai main faqeer-e-benawa

Mujh ko is aalam se kar de beniyaaz Door ho dil se mere hirs-o-hawa

Aatish-e-dozakh se aiman rakh mujhe Ho meri qismat mein jannat ki hawa

Umr baqi yaad mein teri kate Sohbat-e-bad se rakhun nit inziwa

Kalimatul-haq khalq se kehta rahun Go kisi par talkh ho jyun elwa

Sar pe sab us ke rahein Peeraan-e-Peer Sidq se jis ne qadam mera chhuwa

Offline Lyrics Anytime, Anywhere - Download the App Today!

Dil mein yun rang-e-fana-o-faqr de Tan pe hai jaise libaas-e-gerwa

Tujh se hai umeed-e-bakhshish ki mujhe Hai tera mehboob mera peshwa

Ae Khuda tujh ko Muhammad ki qasam Bakhsh de mere fe'l-e-zisht-o-narawa

Khatima bil-khair mujh aasi ka ho Reham ke laiq hun ab buddha huwa

Gor mujh ko dekh ke kehne lage Hai bihishti ae farishto yeh muwa

Hashr mein jhat-pat wahan pahunche Turab Ho jahan qaim Muhammad ﷺ ka liwa