Zairo Pass Adab Rakho

زائرو پاسِ اَدب رکھو ہَوَس جانے دو آنکھیں اندھی ہوئی ہیں ان کو ترَس جانے دو

Instant Access to Thousands of Lyrics - Tap to Install!

سُوکھی جاتی ہے اُمید غربا کی کھیتی بُوندیاں لکۂ رحمت کی برس جانے دو

پلٹی آتی ہے ابھی وجد میں جانِ شیریں نغمۂ قُم کا ذرا کانوں میں رَس جانے دو

ہم بھی چلتے ہیں ذرا قافلے والو! ٹھہرو گٹھریاں توشۂ اُمید کی کَس جانے دو

دِید گل اور بھی کرتی ہے قِیامت دل پر ہمصفیرو ہمیں پھر سُوئے قفس جانے دو

آتِش دِل بھی تو بھڑکاؤ ادب داں نالو کون کہتا ہے کہ تم ضبطِ نفس جانے دو

یوں تنِ زار کے درپے ہوئے دل کے شعلو شیوۂ خانہ براندازیِ خس جانے دو

اے رضاؔ آہ کہ یوں سہل کٹیں جرم کے سال دو گھڑی کی بھی عبادت تو برس جانے دو