Sun Ko Khuda Ke Waste

Sun lo Khuda ke waaste apne gada ki arz Yeh arz hai huzoor bade benawa ki arz

Un ke gada ke dar pe hai yun badshah ki arz Jaise ho badshah ke dar par gada ki arz

Aajiz nawaziyon pe karam hai tula hua Woh dil laga ke sunte hain har benawa ki arz

Qurban un ke naam ke be un ke naam ke Maqbool ho na khaas janaab-e-Khuda ki arz

Never Be Without Your Favorite Lyrics - Get the App for Offline Access!

Gham ki ghataein chhayi hain mujh teera bakht par Ae Mehr sun le zarra-e-be-dast-o-pa ki arz

Ae bekasun ke haami-o-yawar siwa tire Kis ko garaz hai kaun sune mubtala ki arz

Ae kimiya-e-dil mein tire dar ki khaak hoon Khaak-e-dar huzoor se hai kimiya ki arz

Uljhan se door noor se maamoor kar mujhe Ae zulf-e-paak hai yeh aseer-e-bala ki arz

Dukh mein rahe koi yeh gawara nahi unhein Maqbool kyun na ho dil-e-dard aashna ki arz

Kyun tool doon huzoor yeh dein yeh ata karein Khud jaante hain aap mire mudda'a ki arz

Daaman bharein ge daulat-e-fazl-e-Khuda se hum Khaali kabhi gayi hai Hasan Mustafa ki arz