Dam e Iztrab Mujh Ko

Dam-e-iztirab mujh ko jo khayal-e-yaar aaye Mere dil mein chain aaye to use qarar aaye

Teri wehshaton se ae dil mujhe kyun na aar aaye Tu unhein se door bhaage jinhein tujh pe pyaar aaye

Mere dil ko dard-e-ulfat woh sukoon de ilahi Meri be-qarariyon ko na kabhi qarar aaye

Mujhe naz’a chain bakhshe mujhe maut zindagi de Woh agar mere sarhane dam-e-ihtizar aaye

Sabab wufoor-e-rehmat meri be-zabaniyan hain Na faghan ke dhang jaanoon na mujhe pukaar aaye

Khilein phool us phaban ke khilein bakht har chaman ke Mere gul pe sadqe ho kar jo kabhi bahaar aaye

Na Habib se Muhib ka kahein aisa pyaar dekha Woh bane Khuda ka pyara tumhein jis pe pyaar aaye

Mujhe kya alam ho gham ka mujhe kya ho gham alam ka Ke ilaaj-e-gham alam ka mere gham-gusar aaye

Jo ameer-o-badshah hain isi dar ke sab gada hain Tumhein shahryaar aaye tumhein taajdar aaye

Jo chaman banaye ban ko jo jinan kare chaman ko Mere baagh mein ilahi kabhi woh bahaar aaye

Yeh Kareem hain woh Sarwar ke likha hua hai dar par Jise lene hon do aalam woh ummeedwar aaye

Never Be Without Your Favorite Lyrics - Get the App for Offline Access!

Tere sadqe jaaye shaha yeh tera zaleel mangta Tere dar pe bheek lene sabhi shahryaar aaye

Chamak utthe khaak-e-teera bane mehar zarra zarra Mere chaand ki sawari jo sar-e-mazaar aaye

Na ruk ae zaleel-o-ruswa dar-e-shahryaar par aa Ke yeh woh nahin hain haasha jinhein tujh se aar aaye

Teri rehmaton se kam hain mere jurm is se zaaid Na mujhe hisab aaye na mujhe shumar aaye

Gul-e-khuld le ke Zahid tumhein khaar-e-Taiba de doon Mere phool mujh ko deeje bade hoshiyaar aaye

Bane zarra zarra gulshan to ho khaar khaar gulban Jo hamare ujde ban mein kabhi woh nigaar aaye

Tere sadqe tera sadqa hai woh shandaar sadqa Woh waqar le ke jaaye jo zaleel-o-khwar aaye

Tere dar ke hain bhikari mile khair dam-e-qadam ki Tera naam sun ke Data hum ummeedwar aaye

Hassan un ka naam le kar tu pukaar dekh gham mein Ke yeh woh nahin jo ghafil pas-e-intezaar aaye