Aasman Gar Tere Talwon Ka

Aasmaan gar tere talwon ka nazara karta Roz ik chand tasadduq mein utara karta

Tawaf-e-Rauza hi pe chakraye thay kuch nawaqif Main toh aapay mein na tha aur jo sajda karta

Sarsar-e-dasht-e-Madinah jo karam farmati Kyun main afsurdagi-e-bakht ki parwa karta

Chup gaya chand na aayi tere deedar ki taab Aur agar samne rehta bhi toh sajda karta

Yeh wahi hain ke giro aap aur un par machlo Ulti baton pe kaho kaun na seedha karta

Hum se zarr’on ki toh taqdeer hi chamka jata Meher farma ke woh jis rah se nikla karta

Dhoom zarr’on mein Ana-ush-shams ki par jati hai Jis taraf se hai guzar chand hamara karta

Aah kya khoob tha gar hazir-e-dar hota main Un ke saya ke talay chain se soya karta

Shauq-o-aadab baham garm-e-kashakash rehte Ishq gum-karda toh un aql se uljha karta

Aankh uthti toh main jhanjhla ke palak si leta Dil bigarta toh main ghabra ke sambhala karta

Bekhudana kabhi sajda mein su-e-dar girta Janib-e-qibla kabhi chaunk ke palta karta

Baam tak dil ko kabhi baal-e-kabootar deta Khaak par gir ke kabhi haye khudaya karta

Gaah marham-nahe-e-zakhm-e-jigar mein rehta Gaah nashtar-zani-e-khoon-e-tamanna karta

Never Be Without Your Favorite Lyrics - Get the App for Offline Access!

Hamrah-e-meher kabhi gard-e-khateera phirta Saya ke sath kabhi khaak pe lota karta

Sohbat-e-dagh-e-jigar se kabhi jee behlata Ulfat-e-dast-o-girebaan ka tamasha karta

Dil-e-hairaan ko kabhi zauq-e-tapish par lata Tapish-e-dil ko kabhi hausla farsa karta

Kabhi khud apne tahayyur pe hairan rehta Kabhi khud apne samajhne ko na samjha karta

Kabhi kehta ke yeh kya bazm hai kaisi hai bahaar Kabhi andaaz-e-tajahul se main tauba karta

Yun hi kehta ke yeh kya josh-e-junoon hai zalim Kabhi phir gir ke tarapne ki tamanna karta

Suthri suthri woh fiza dekh ke main gharq-e-gunah Apni aankhon mein khud is bazm mein khatka karta

Kabhi rehmat ke tasawwur mein hansi aajati Paas-e-aadab kabhi honton ko bakhya karta

Dil agar ranj-e-ma’asi se bigarne lagta Afw ka zikr suna kar main sambhala karta

Yeh mazay khoobi-e-qismat se jo paaye hote Sakht deewana tha gar khuld ki parwah karta

Maut us din ko jo phir naam-e-watan ka leta Khaak us sar pe jo is dar se kinara karta

Ae Hassan qasd-e-Madinah nahi rona hai yahi Aur main aap se kis baat ka shikwa karta