Kare Chara Sazi Ziarat

Kare chara sazi ziyarat kisi ki Bhare zakhm-e-dil ke malahat kisi ki

Chamak kar yeh kehti hai talat kisi ki Ke deedar-e-Haq hai ziyarat kisi ki

Na rehti jo pardon mein surat kisi ki Na hoti kisi ko ziyarat kisi ki

Ajab pyari pyari hai surat kisi ki Hamein kya Khuda ko hai ulfat kisi ki

Abhi paar hon doobne wale beray Sahara laga de jo rehmat kisi ki

Kisi ko kisi se hui hai na hogi Khuda ko hai jitni mohabbat kisi ki

Dam-e-hashr Aasi mazay le rahe hain Shafaat kisi ki hai rehmat kisi ki

Rahe dil kisi ki mohabbat mein har dam Rahe dil mein har dam mohabbat kisi ki

Tera qabza-e-konain-o-ma feehima par Hui hai na ho yun hukumat kisi ki

Khuda ka diya hai tere paas sab kuch Tere hotay kya hum ko haajat kisi ki

Zamane ki daulat nahi paas phir bhi Zamane mein batti hai daulat kisi ki

Na pohanchain kabhi aqal-e-kul ke farishtay Khuda jaanta hai haqeeqat kisi ki

Hamara bharosa hamara sahara Shafaat kisi ki himayat kisi ki

Qamar ik isharey mein do tukray dikhaya Zamane pe roshan hai taqat kisi ki

Hamein hain kisi ki shafaat ki khatir Hamari hi khatir shafaat kisi ki

Musibat zadoo shad ho tum ke un se Nahi dekhi jaati musibat kisi ki

Na pohanchain ge jab tak gunahgar un ke Na jaye gi jannat mein ummat kisi ki

Hum aisay gunahgar hain zuhad walo Hamari madad par hai rehmat kisi ki

Madinah ka jangal ho aur hum hon Zahid Nahi chahiye hum ko jannat kisi ki

Hazaron hon khursheed-e-mahshar to gham kya Yahan saya gustar hai rehmat kisi ki

Bharay jayain ge khuld mein ahl-e-isyaan Na jaye gi khaali shafaat kisi ki

Wahi sab ke maalik unhi ka hai sab kuch Na Aasi kisi ke na jannat kisi ki

Rafa'na laka dhikrak par tasadduq Sab oonchon se oonchi hai rif'at kisi ki

Utrnay lagay ma ramaita yadullah Charhi aisi zoron pe taqat kisi ki

Gada khush hon khairullaka ki sada hai Ke din dooni hai barhti daulat kisi ki

Fatarda ne daali hain bahein galay mein Ke ho jaye raazi tabiyat kisi ki

No Internet? No Problem! Get the App for Offline Lyrics!

Khuda se dua hai ke hangam-e-rukhsat Zuban-e-Hassan par ho midhat kisi ki