Shahan e Jahan Kis Liye

Shahan-e-jahan kis liye sharmaye huye hain Kya bazm mein Taibah ke gada aaye huye hain?

Hangama-e-mahshar mein kahan habs ka khadsha Gesu Shah-e-Konain ﷺ ke lehraye huye hain

Hajat nahi junbish ki yahan aye lab-e-sail! Woh yun bhi karam haal pe farmaye huye hain

Yeh shahar-e-Madinah hai ke hai ek kashish aabad Mehsoos yeh hota hai ke ghar aaye huye hain

Isar-o-musawat-o-muakhat-o-tawazu Yeh phool sabhi aap ke mehkaye huye hain

Kal apni inayat se na rakhein humein mehroom Kuch bhi hain, magar aap ke kehlaye huye hain

Ya Shah-e-Umam ﷺ! ek nazar un ki taraf bhi Daman-e-tamanna ko jo phailaye huye hain

Khursheed-e-jahantab ho, ya mah-e-shab afroz Dono tere chehre se ziya paye huye hain

Milti nahi dil ko kisi pehlu bhi tasalli Lamhat-e-hazoori hain ke tarpaye huye hain

Is waqt na chher aye kashish-e-lazzat-e-dunya! Is waqt mere dil ko woh yaad aaye huye hain

Sultan-e-do-alam ﷺ ki ata aur yeh aasi Kuch log to is baat pe chakraye huye hain

Havi hai falak kulliyatan jaise zameen par Is tarah mere zehen pe woh chhaye huye hain

Jannat ki fazayein unhein behla na sakengi Jo aap ki galiyon ki hawa khaye huye hain

No More Screenshots! Save Storage with Our Lyrics App!

Ban jaye gi mahshar mein Naseer ab teri bigri Sarkar ﷺ, shafa’at ke liye aaye huye hain