Shah e Konain Jalwa Numa

Shah-e-Kaunain jalwa-numa ho gaya Rang-e-aalam ka bilkul naya ho gaya

Muntakhab aap ki zaat-e-wala hui Naam-e-pak aap ka Mustafa ho gaya

Mil gaya tujh se Allah ka raasta Haq se milne ka tu wasta ho gaya

Aap woh noor-e-Haq hain ke Quran mein Wasf-e-rukh aap ka waddoha ho gaya

Aisa azaaz kis ko Khuda ne diya Jaisa bala tera martaba ho gaya

Lamakan mein bulaya Khuda ne tujhe Arsh-o-kursi se bhi tu wara ho gaya

Aisi nafiz tumhari hukumat hui Tum ne jis waqt jo kuch kaha ho gaya

Mah do-para hua suraj ulta phira Jab ishara tumhara zara ho gaya

Kun ki kunji na kyonkar ho teri zabaan Hukm-e-Rehman tera kaha ho gaya

Lab-e-Isa se zahir tha jo mojaza Teri thokar se Mawla ada ho gaya

Sair kar jaayen aakar janab-e-Masih Shahr-e-Tayyaba bhi dar-ul-shifa ho gaya

Khak-e-rauza ki kuhl-ul-jawahir hui Taj-e-shahaan tera naqsh-e-pa ho gaya

Aatish-e-ishq-e-Mawla se jo dil tapa Mail se saaf ho kar khara ho gaya

Jis ne nazzara-e-sabz gumbad kiya Us ka poora har ik mudda ho gaya

Hum bhi Tayyaba ko ud jaayenge ek din Naaz kyon tujh ko baad-e-saba ho gaya

Tere hi noor se dono aalam bane Tu hi to ibtida inteha ho gaya

Us ne wallah Allah ko pa liya Jo koi tujh pe dil se fida ho gaya

Haq Ta'ala ka woh banda-e-khaas hai Sachay dil se jo banda tera ho gaya

Paar gardab-e-isyaan se kyonkar na ho Jis ki kashti ka tu nakhuda ho gaya

Tere sadqay ke har dard-o-gham mein tu hi Naam-lewon ka mushkil-kusha ho gaya

Naam-e-naami tera naam-e-Haq Ya Nabi Natawanon ke haq mein asa ho gaya

Us ko fursat gham-e-do-jahaan se mili Jo bhi dil se ghulam aap ka ho gaya

Roo-siyahon ko koi nahi poochta Haan bharosa teri zaat ka ho gaya

Asiyon ka nahi koi pursaan-e-haal Ik sahara faqat aap ka ho gaya

Get Lyrics On-The-Go! Download Our App Now!

Roz-e-mahshar har ik naam-lewa tera Ik isharey mein tere riha ho gaya

Lo mubarak tumhare liye asiyo Baab-e-rehmat Muhammad ka wa ho gaya

Khalq kyonkar na us ko kahe tajdar Jo tere aastan ka gada ho gaya

Sarwaro ki usay sarwari mil gayi Tere rauza pe jo sar fida ho gaya

Kyon na hasil ho us ko hayat-e-abad Rauza-e-pak par jo fana ho gaya

Ya Nabi teri chaukhat pe ushaq ko Maut aur zindagi ka maza ho gaya

Kuch bashar hi nahi balkay jin-o-malak Sab ko sadqa tumhara ata ho gaya

Wah wah teri izzat ke tere sabab Teri ummat pe fazl-e-Khuda ho gaya

Naam tera shaha har marz ke liye Naam-lewon ko tere dawa ho gaya

Daagh-e-ulfat ki aisi badhi taazgi Zakhm dil ka hamaray hara ho gaya

Gor mein hashr mein daagh-e-ishq-e-Nabi Ghairat-e-shams-o-badru-duja ho gaya

Naam tera dam-e-naz'a jis ne liya Us ka imaan par khatma ho gaya

Dushman-o-dost muflis gareeb-o-ameer Tere sadqay mein sab ka bhala ho gaya

Ilm-e-ghaib-e-Nabi ka jo munkir hua Qahr-e-Qahhar mein mubtala ho gaya

Dekh aaina Najdi ke tauheen se Tera chehra to ulta tawa ho gaya

Naaz kar ae Jameel apni qismat pe tu Khak-e-na'lain-e-Ahmed Raza ho gaya