Sabz Gumbad Kon Dekhe

Sair-e-gulshan kaun dekhe dasht-e-Taiba chhor kar Suye jannat kaun jaaye dar tumhara chhor kar

Sarguzasht-e-gham kahoon kis se tere hote hue Kis ke dar par jaaun tera aastana chhor kar

Be-liqaye-yaar un ko chain aa jaata agar Baar baar aate na yun Jibreel Sidra chhor kar

Download Lyrics & Access Offline - Install Our App Now!

Kaun kehta hai dil-e-be-mudda'a hai khoob cheez Main to kori ko na loon un ki tamanna chhor kar

Mar hi jaaun main agar us dar se jaaun do qadam Kya bache bimaar-e-gham qurb-e-Masiha chhor kar

Kis tamanna par jiyen ya Rab aseeran-e-qafas Aa chuki baad-e-saba bagh-e-Madinah chhor kar

Bakhshwana mujh se aasi ka rawa ho ga kise Kis ke daaman mein chhupon daaman tumhara chhor kar

Khuld kaisa nafs-e-sarkash jaaunga Taiba ko main Bad-chalan hat kar khara ho mujh se rasta chhor kar

Aise jalwe par karoon main lakh hooron ko nisaar Kya gharaz kyon jaaun jannat ko Madinah chhor kar

Hashr mein ek ek ka munh takte phirte hain adu Aafton mein phans gaye un ka sahara chhor kar

Mar ke jeete hain jo un ke dar pe jaate hain Hasan Jee ke marte hain jo aate hain Madinah chhor kar