Sab Se Aula o Aala

Sab se awla o aala hamara Nabi Sab se bala o aala hamara Nabi

Apne Mawla ka pyara hamara Nabi Dono aalam ka dulha hamara Nabi

Bazm-e-aakhir ka shama-e-farozaan hua Noor-e-awwal ka jalwa hamara Nabi

No Internet? No Problem! Get the App for Offline Lyrics!

Jis ko shayaan hai arsh-e-Khuda par juloos Hai woh Sultan-e-wala hamara Nabi

Bujh gayin jis ke aage sabhi mash'alein Shama woh le kar aaya hamara Nabi

Jis ke talwon ka dhovan hai aab-e-hayat Hai woh jaan-e-Maseeha hamara Nabi

Arsh o kursi ki theen aaina bandiyan Soo-e-Haq jab sidhara hamara Nabi

Khalq se awliya, awliya se rusul Aur rasoolon se aala hamara Nabi

Hasan khata hai jis ke namak ki qasam Woh maleeh-e-dil aara hamara Nabi

Jis ki do boond hain Kawsar o Salsabeel Hai woh rahmat ka darya hamara Nabi

Jaise sab ka Khuda ek hai waise hi In ka un ka tumhara hamara Nabi

Qarnon badli rasoolon ki hoti rahi Chand badli se nikla hamara Nabi

Kaun deta hai dene ko munh chahiye Dene wala hai saccha hamara Nabi

Kya khabar kitne taare khile chhup gaye Par na doobay na dooba hamara Nabi

Mulk-e-konain mein ambiya tajdar Tajdaron ka aaqa hamara Nabi

Lamakaan tak ujala hai jis ka woh hai Har makaan ka ujala hamara Nabi

Saare acchon mein accha samajhiye jisay Hai us acche se accha hamara Nabi

Ambiya se karoon arz kyun Maaliko Kya Nabi hai tumhara hamara Nabi

Jis ne tukray kiye hain qamar ke woh hai Noor-e-wahdat ka tukra hamara Nabi

Jis ne murda dilon ko di umr-e-abad Hai woh jaan-e-Maseeha hamara Nabi

Ghamzadon ko Razaؔ muzdah deejiye ke hai Bekason ka sahara hamara Nabi