Rang Chaman Passand Na

Rang-e-chaman pasand na phoolon ki boo pasand Sahra-e-Taibah hai dil-e-bulbul ko tu pasand

Apna aziz woh hai jise tu aziz hai Hum ko hai woh pasand jise aaye tu pasand

Mayoos ho ke sab se main aaya hoon tere paas Ae jaan kar le toote hue dil ko tu pasand

Why Screenshot When You Can Download? Get the App for Efficient Storage!

Hain khana zaad banda-e-ehsaan tu kya ajab Teri woh khoo hai karte hain jis ko adu pasand

Kyunkar na chaahein teri gali mein hon mit ke khaak Duniya mein aaj kis ko nahin aabroo pasand

Hai khaaksaar par karam-e-khaas ki nazar Aajiz nawaaz hai teri ae khubroo pasand

Qul keh kar apni baat bhi lab se tere suni Allah ko hai itni teri guftagoo pasand

Hoor-o-farishta jinn-o-bashar sab nisaar hain Hai do jahaan mein qabza kiye chaar soo pasand

Un ke gunahgaar ki umeed-e-afw ko Pehle kare gi aayat la taqnatoo pasand

Taibah mein sar jhukaate hain khaak-e-niyaaz par Konain ke bade se bade aabroo pasand

Hai khwahish-e-wisaal-e-dar-e-yaar ae Hassanؔ Aaye na kyun Asar ko meri aarzoo pasand