Parda Rukh e Anwar Se

Parda rukh-e-anwar se jo utha Shab-e-Meraj Jannat ka hua rang dubala Shab-e-Meraj

Hooron ne bhi gaaya yeh tarana Shab-e-Meraj Khaliq ne Muhammad ko bulaya Shab-e-Meraj

Gaisu khule ghanghor ghata uthi ke hum par Baran-e-karam jhoom ke barsa Shab-e-Meraj

Aye Rahmat-e-Alam teri rahmat ke tasadduq Har ek ne paaya tera sadqa Shab-e-Meraj

Jis waqt chali Shah-e-Madinah ki sawari Sajday mein jhuka arsh-e-mu’alla Shab-e-Meraj

Download Lyrics & Access Offline - Install Our App Now!

Khursheed-o-Qamar arz-o-sama arsh-o-mala’ik Kis ne nahin paaya tera sadqa Shab-e-Meraj

Woh josh tha anwar ka aflak ke oopar Milta na tha nazara ko rasta Shab-e-Meraj

Mehman bulane ke liye apne Nabi ko Allah ne Jibreel ko bheja Shab-e-Meraj

Yeh shan-e-jalalat ke nihayat hi adab se Jibreel ne Aaqa ko jagaya Shab-e-Meraj

Jibreel bhi hairan hue dekh ke rutba Sidrah se qadam jab ke barhaya Shab-e-Meraj

Jibreel thakay hogaye Sarkar rawana Munh takta hua reh gaya Sidrah Shab-e-Meraj

Hamrah sawari ke thin afwaj-e-mala’ik Ban kar chalay us shan se dulha Shab-e-Meraj

Yun Masjid-e-Aqsa mein namaz us ne parhai Talib se milein parh ke dogana Shab-e-Meraj

Har ek Nabi balkay sab aflak ke qudsi Parhtay thay shehanshah ka khutba Shab-e-Meraj

Jan-e-dojahan rif'at-e-Sarkar pe qurban Kehta tha yeh barh barh kar rafa’na Shab-e-Meraj

Muddat se jo arman tha woh aaj nikala Hooron ne kiya khoob nazara Shab-e-Meraj

Aarasta ho khuld mu’addab hon farishtay Yun hatif-e-ghaibi ne pukara Shab-e-Meraj

Peham chali aati thin duaon ki sadayein Har raat Nabi ki ho khudaya Shab-e-Meraj

Thi rasta bhar un pe duroodon ki nichawar Bandha gaya tasleem ka sehra Shab-e-Meraj

Dulha thay Muhammad to barati thay farishtay Is shan se pohanchay mere Mawla Shab-e-Meraj

Allah ki rahmat se woh mehka gul-e-wahdat Khushbu se basa aalam-e-bala Shab-e-Meraj

Roshan hue sab arz-o-sama noor se us ke Jab Mah-e-Arab arsh pe chamka Shab-e-Meraj

Tha charkh-e-chaharum pe koi Toor ke oopar Sarkar gaye arsh se bala Shab-e-Meraj

Jab pohanchay maqam-e-fathadalla pe Muhammad Khaliq se raha kuch bhi na parda Shab-e-Meraj

Aye salli ala bazm-e-tadalla mein pohanch kar Is zaat mein gum hogaye Aaqa Shab-e-Meraj

Mumkin hi nahin aql-e-do-aalam ki rasai Aisa diya Allah ne rutba Shab-e-Meraj

Arsh-o-malak-o-arz-o-sama jannat-o-dozakh Is Shah ne har cheez ko dekha Shab-e-Meraj

Tafseel se ki sair magar us pe yeh turra Ik pal mein yeh tay hogaya rasta Shab-e-Meraj

Zanjeer dar-e-paak ki hilti hui pai Aur garm tha woh bistar-e-aala Shab-e-Meraj

Aye Mah-e-Madinah teri tanveer ke qurban Chamka diya ummat ka naseeba Shab-e-Meraj

Lo aasiyo woh tum ko wahan par bhi na bhoolay Kaata gaya isyan ka siyaha Shab-e-Meraj

Aye momino muzda ke woh Allah se laye Bakhshaish-e-ummat ka qabala Shab-e-Meraj

Bhejun ga main ummat ko teri khuld mein pehlay Haq ne kiya mehboob se wada Shab-e-Meraj

Us mein se Jameel Rizvi ko bhi ata ho Rahmat ka bata khaas jo hissa Shab-e-Meraj