Paat Woh Kuch Dhar Yeh Kuch

Paat woh kuch dhaar yeh kuch zaar hum Ya Ilahi kyun kar utrein paar hum

Kis bala ki mai se hain sarshaar hum Din dhala hote nahin hoshiyaar hum

Tum karam se mushtari har aib ke Jins-e-na-maqbool-e-har bazaar hum

Dushmanon ki aankh mein bhi phool tum Doston ki bhi nazar mein khaar hum

Lagzish-e-pa ka sahaara ek tum Girne waale laakhon na-hanjaar hum

Sadqa apne baazuo'n ka al-madad Kaise torein yeh but-e-pindaar hum

Dam-e-qadam ki khair ae Jaan-e-Masih Dar pe laaye hain dil-e-bimaar hum

Apni rehmat ki taraf dekhein Huzoor Jaante hain jaise hain badkaar hum

Apne mehmaanon ka sadqa ek boond Mar mite pyaase idhar Sarkaar hum

Apne koocha se nikala to na do Hain to had bhar ke khudaai khaar hum

Haath utha kar ek tukra ae Kareem Hain sakhi ke maal mein haqdaar hum

Chaandni chhatki hai un ke noor ki Aao dekhein sair-e-Toor-o-naar hum

Himmat ae za'f un ke dar par gir ke hoon Be-takalluf saaya-e-deewaar hum

Ba-ataa tum Shah tum mukhtaar tum Be-nawa hum zaar hum naachaar hum

Tum ne to laakhon ko jaanein pher dein Aisa kitna rakhte hain aazaar hum

Apni sattaari ka ya Rabb waasta Houn na ruswa bar sar-e-darbaar hum

Itni arz-e-aakhiri keh do koi Naao tooti aa pare minjhdaar hum

Munh bhi dekha hai kisi ke afv ka Dekh o isyaan nahin be-yaar hum

Main nisaar aisa musalmaan kijiye Tod daalein nafs ka zunnaar hum

Kab se phailaaye hain daaman tegh-e-ishq Ab to paayein zakhm-e-daaman-daar hum

Sunniyat se khatke sab ki aankh mein Phool ho kar ban gaye kya khaar hum

Na-tawaani ka bhala ho ban gaye Naqsh-e-paaye taalibaan-e-yaar hum

Dil ke tukre nazr-e-haazir laaye hain Ae sagaan-e-koocha-e-dildaar hum

Qismat-e-Thaur-o-Hira ki hirs hai Chahte hain dil mein gehra ghaar hum

Chashm-poshi o karam shaan-e-shuma Kaar-e-ma be-baaki o israar hum

Fasl-e-gul sabza saba masti shabaab Chhorein kis dil se dar-e-khummaar hum

Maikada chhoota hai lillaah Saqiya Ab ke saaghar se na hon hoshiyaar hum

Saqi-e-Tasneem jab tak aa na jaayein Ae siyah masti na hon hoshiyaar hum

Naazishein karte hain aapas mein malak Hain ghulaamaan-e-Shah-e-Abraar hum

No More Screenshots! Save Storage with Our Lyrics App!

Lutf-e-az-khud raftagi ya Rabb naseeb Hoon shaheed-e-jalwa-e-raftaar hum

Un ke aage daawa-e-hasti Razaؔ Kya bake jaata hai yeh har baar hum