Nabi Aaj Paida Hua Chahta Hai

Nabi aaj paida hua chahta hai Yeh Kaaba ghar us ka hua chahta hai

Alam nasb hai jis ka Kaaba ki chhat par Buland us ka shohra hua chahta hai

Na kyun aaj Kaaba bane rashk-e-gulshan Woh gul jalwa farma hua chahta hai

Yeh ro ro ke aapas mein but keh rahe hain Khuda jaane ab kya hua chahta hai

Tari hai samawa mein Sawa mein khushki Naya ab zamana hua chahta hai

Nida aa rahi hai ke Haq ke qamar ka Jahan mein ujala hua chahta hai

Wuhoosh o tuyoor aaj goya hain baham Ke rehmat ka daura hua chahta hai

Offline Lyrics Anytime, Anywhere - Download the App Today!

Kharide ga isyaan ko rehmat ke badle Kharidar paida hua chahta hai

Yeh aalam banaya hai jis ka barati Huwaida woh dulha hua chahta hai

Jo aalam ko qatre se sairab kar de Rawaan aisa darya hua chahta hai

Falak ke sitare jhuke aa rahe hain Ke paida woh Maula hua chahta hai

Khuda ke khazano ka mukhtar o hakim Shah-e-deen o dunya hua chahta hai

Salatin-e-aalam gada hon ke us ka Do-aalam pe qabza hua chahta hai

Kahanat ke daftar pe aayi tabahi Malaik ka pehra hua chahta hai

Yeh kehte hain ashjar o ahjar baham Nabi zeb-e-dunya hua chahta hai

Malaik mu'addab rahein hukm-e-Haq hai Ke mehboob paida hua chahta hai

Utho behr-e-tazeem ae ahl-e-mehfil Nabi jalwa farma hua chahta hai

Salat o salam arz kar ae Jameel ab Ijabt ka dar wa hua chahta hai