Nabi Aaj Paida Hua Chahta Hai

نبی آج پیدا ہوا چاہتا ہے یہ کعبہ گھر اس کا ہوا چاہتا ہے

علم نصب ہے جس کا کعبہ کی چھت پر بلند اس کا شہرہ ہوا چاہتا ہے

نہ کیوں آج کعبہ بنے رَشکِ گلشن وہ گل جلوہ فرما ہوا چاہتا ہے

یہ رو رو کے آپس میں بت کہہ رہے ہیں خدا جانے اب کیا ہوا چاہتا ہے

تری ہے سماوا میں ساوا میں خشکی نیا اب زمانہ ہوا چاہتا ہے

ندا آرہی ہے کہ حق کے قمر کا جہاں میں اُجالا ہوا چاہتا ہے

وُحوش و طیور آج گویا ہیں باہم کہ رحمت کا دَورا ہوا چاہتا ہے

خریدے گا عصیاں کو رحمت کے بدلے خریدار پیدا ہوا چاہتا ہے

یہ عالم بنایا ہے جس کا براتی ہویدا وہ دولہا ہوا چاہتا ہے

جو عالم کو قطرے سے سیراب کردے رَواں ایسا دَریا ہوا چاہتا ہے

فلک کے ستارے جھکے آرہے ہیں کہ پیدا وہ مولیٰ ہوا چاہتا ہے

خدا کے خزانوں کا مختار و حاکم شہِ دِین و دنیا ہوا چاہتا ہے

سلاطینِ عالم گدا ہوں کہ اس کا دوعالم پہ قبضہ ہوا چاہتا ہے

کہانت کے دَفتر پہ آئی تباہی مَلائک کا پہرہ ہوا چاہتا ہے

یہ کہتے ہیں اَشجار و اَحجار باہم نبی زیبِ دنیا ہوا چاہتا ہے

ملائک مؤدب رہیں حکمِ حق ہے کہ محبوب پیدا ہوا چاہتا ہے

اُٹھو بہرِ تعظیم اے اَہلِ محفل نبی جلوہ فرما ہوا چاہتا ہے

صلوۃ و سلام عرض کر اے جمیلؔ اب اِجابت کا دَر وا ہوا چاہتا ہے