Na Mayoos Ho Mere Dukh

Na mayus ho mere dukh dard wale Dar-e-Shah pe aa har marz ki dawa le

Jo bimar-e-gham le raha ho sambhale Woh chahe to dam bhar mein us ko sambhale

Na kar is tarah ae dil-e-zar nale Woh hain sab ki faryad ke sunne wale

Koi dam mein ab doobta hai safina Khudara khabar meri ae nakhuda le

Why Screenshot When You Can Download? Get the App for Efficient Storage!

Safar kar khayal-e-rukh-e-Shah mein ae jaan Musafir nikal ja ujale ujale

Tahi dast-o-sauda-e-bazar-e-mahshar Meri laaj rakh le mere Taj wale

Zahe shaukat-e-astan-e-mu’alla Yahan sar jhukate hain sab Taj wale

Siwa tere ae nakhuda-e-ghariban Woh hai kaun jo doobton ko nikale

Yehi arz karte hain shairan-e-alam Ke tu apne kutton ka kutta banale

Jise apni mushkil ho asan karni Faqiran-e-Taiba se aakar dua le

Khuda ka karam dastgiri ko aaye Tera naam le lein agar girne wale

Dar-e-Shah par ae dil muradein milengi Yahan baith kar hath sab se uthale

Ghara hoon main isyan ki tarikiyon mein Khabar meri ae mere Badrud-duja le

Faqiron ko milta hai be-mange sab kuch Yahan jante hi nahin tale bale

Lagaye hain paiwand kapron mein apne Urhae faqiron ko tum ne doshale

Mita kufr ko deen chamka de apna Banen masjidein toot jayen shiwale

Jo pesh-e-sanam sar jhukate the apne Bane teri rehmat se Allah wale

Nigahe ze chashm-e-karam bar Hasan kun Ba-kuye-t rasidest ashufta hale