Muzdah Bad Aye Asiyo

Mujdah baad ae aasiyo! Shafi-e-Shah-e-Abrar hai Tahniyat ae mujrimo! Zaat-e-Khuda Ghaffar hai

Arsh sa farsh-e-zameen hai farsh-e-pa Arsh-e-bareen Kya nirali tarz ki naam-e-Khuda raftar hai

Chand shaq ho pair bolein janwar sajde karein BarakAllah marja-e-alam yahi sarkar hai

Jin ko su-e-aasman phaila ke jal thal bhar diye Sadqa un hathon ka pyare hum ko bhi darkar hai

Lab zulal-e-chashma-e-Kun mein gundhe waqt-e-khameer Murde zinda karna ae jaan tum ko kya dushwar hai

Gore gore paon chamka do Khuda ke waste Noor ka tadka ho pyare gor ki shab-e-taar hai

Tere hi daman pe har aasi ki padti hai nazar Ek jaan-e-be-khata par do jahan ka baar hai

No More Screenshots! Save Storage with Our Lyrics App!

Josh-e-toofan bahr-e-be-payan hua na-sazgar Nooh ke Maula karam kar le to beda paar hai

Rahmatullil'alameen teri duhai dab gaya Ab to Maula be-tarah sar par gunah ka baar hai

Hairatein hain aaina-dar-e-vufoor-e-wasf-e-Gul Un ke bulbul ki khamoshi bhi lab-e-izhaar hai

Goonj goonj uthe hain naghmat-e-Raza se bostan Kyun na ho kis phool ki midhat mein va minqar hai