Madine Humein Le Gaya

Madine hamein le gaya tha muqaddar Madine mein kaisa suroor aa raha tha

Na hum kaash! aate yahan laut kar ghar Madine mein kaisa suroor aa raha tha

Wahan barish-e-noor hoti thi paiham Na duniya ki jhanjhat zamane ka gham tha

Mila tha hamein qurb-e-mehboob-e-dawar Madine mein kaisa suroor aa raha tha

Khushi bhi khushi se wahan jhoomti thi Masarrat mere chautaraf ghoomti thi

Your Lyrics, Even Offline - Install the App for Free!

Maza bhi maze le raha tha wahan par Madine mein kaisa suroor aa raha tha

Kabhi rubaru sabz gumbad ka manzar Kabhi takte hum un ke deewar aur dar Kabhi saamne hote mehrab-o-mimbar Madine mein kaisa suroor aa raha tha

Wahan raah chalte the hum dast-basta Durood un pe parhte kabhi saara rasta Kabhi naat parhte the hum raaste bhar Madine mein kaisa suroor aa raha tha

Kabhi baithte un ki masjid mein ja kar Kabhi door se takte mehrab-o-mimbar Namazon ka bhi lutf tha kya wahan par Madine mein kaisa suroor aa raha tha

Fazaaein munawwar hawaein mu'attar Samaan tha wahan kis qadar kaif-awar Jahan mein kahin bhi nahi aisa manzar Madine mein kaisa suroor aa raha tha

Madine ka sehra bhi rashk-e-gulistan Tasaddun mughailan pe baad-e-baharan Tani thi paharon pe noorani chadar Madine mein kaisa suroor aa raha tha

Kabhi mast ho kar shajar jhoomte the To jhar jhar ke patte zameen choomte the Utha lete un ko kabhi hum bhi barh kar Madine mein kaisa suroor aa raha tha

Wahan to andhere mein bhi roshni hai Yahan par ujale mein bhi teergi hai Wahan din the roshan to shab bhi munawwar Madine mein kaisa suroor aa raha tha

Khusha! dhoop thi thandi thandi wahan par Thi kya chhaon bhi mehki mehki wahan par Wahan zarra zarra hai sad rashk-e-gauhar Madine mein kaisa suroor aa raha tha

Yaqeenan Madinah hai sad rashk-e-jannat Madine mein hai meethe Aaqa ki turbat Ae Attar kyun chhor kar aaye woh dar Madine mein kaisa suroor aa raha tha