We've added ads to help keep the platform running and improving for you.

Machi Hai Dhoom TamheedNot Verified

Jamil ur Rehman Qadri

Machi hai dhoom tahmeed-o-sana ki Sadayein aati hain salli ala ki


Mohabbat jis ko hai Khair-ul-Wara ki Inayat us pe hai har dam Khuda ki


Jinhon ne khalq ki haajat rawa ki Unhi se hum ne apni iltija ki


Madad karna meri ae Nasir-e-khalq Ke mere nafs-e-kafir ne dagha ki


Madad ki har musibat se bachaya Duhai jab bhi di Shah-e-Huda ki


Main hoon jin ka wahi hain mere shafi To phir kyun fikr ho roz-e-jaza ki


Gunah-garon mubarak baad tum ko Woh rakhte hain mohabbat inteha ki


Khuda farmaye jab Quran mein Yaseen Sana phir kya ho durr-e-be-baha ki


Hain taban mehr-o-mah anjum darakhshan Ziya hai ariz-e-Badr-ud-Duja ki


Tamami ambiya aaye mubashir Khabar awwal se thi us mubtada ki


Shab-e-Meraj jab Aqsa mein pohunche Rasoolon ne unhi ki iqtida ki


Do-alam ne'amaton se bhar diya hai Bhala kuch inteha hai us ata ki


Duayein de rahe hain dushmanon ko Yeh shan-e-hilm hai kaan-e-sakha ki


Usi dar ke hain hum mangta bhikhari Jahan par bheer hai shah-o-gada ki


Samee Nasir jin ke hain alqab Woh sunte hain pukar apne gada ki


Hain sab arz-o-sama-o-arsh roshan Chamak hai jalwa-haye janfiza ki


Kaha ja-oo-ka ne aao yahan par Ma'afi milti hai har ik khata ki


Tasawwuf chahiye gar tujh ko soofi Ita'at kar Imam-ul-Asfiya ki


Ata foran kiya jo kuch bhi manga Yahan haajat agar ki hai na la ki


Azal ke roz se kawn-o-makan mein Unhi ke naam ki naubat baja ki


Farishton ne kiya Adam ko sajda Yeh thi ta'zeem noor-e-Mustafa ki


Hawa mardood la'nat ka para toq Ibadat ki bhi Najdi ne to kya ki



Free Up Space - Get Lyrics Without Bulky Screenshots!

Get it on Google Play


Karam un ka inayat hai yeh un ki Khabar lete hain mujh jaise gada ki


Mujhe banda kiya Shah-e-Huda ka Bari rahmat hui Rabb-ul-Ula ki


Ho muzdah aasiyon ko roz-e-mahshar Sadayein aayengi inni laha ki


Badaulat naqsh-e-paye Mustafa ke Barhi izzat hareem-e-Kibriya ki


Tumhara aastana mil gaya jab Mujhe khwahish ho kyun Dar-ul-Shifa ki


Hamesha main ne nafarmaniyan keen Inayat tum ne mujh par da'iman ki


Khuda ne kar liya mehboob apna Khusha qismat muhibb-e-Mustafa ki


Meri taqdeer mein likha hua hai Karam haq ka shafa'at Mustafa ki


Tumhara rooye anwar dekhte hi Nazar aane lagi qudrat Khuda ki


Yeh farmaya Shab-e-Isra Khuda ne Ke teri ummat-e-aasi raha ki


Kiya aflak ko do gaam mein tay Yeh tezi hai Buraq-e-barq pa ki


Salateen-e-zamana ne ba-sad aajz Tumhare dar pe arz-e-mudda'a ki


Woh pohunchi darja-e-maqbooliyat par Tumhara naam le kar jo dua ki


Abhi jee uthe murday kalma parhte Hawa pohunche jo daman-e-qaba ki


Utha kar le gayin hoorein jinan mein Qadam par un ke jis ne jaan fida ki


Andheri raat hai waqt-e-madad hai Ghata chhayi hui hai kis bala ki


Luta jata hai jangal mein akela Khudara lo khabar is be-nawa ki


Bhanwar mein phans gayi kashti hamari Duhai doobton ke nakhuda ki


Jameel Qadri taqdeer chamki Ke khidmat mil gayi Murshid Raza ki

Instant Access to Thousands of Lyrics - Tap to Install!

Get it on Google Play

midhah-logo-grey© 2026 Midhah