We've added ads to help keep the platform running and improving for you.

Kyunkar Na Ho Makke SeNot Verified

Jamil ur Rehman Qadri

Kyunkar na ho Makkah se siwa shaan-e-Madinah Woh jabke hua maskan-e-Sultan-e-Madinah



Why Screenshot When You Can Download? Get the App for Efficient Storage!

Get it on Google Play


Makkah ko sharaf hai to Madinah ke sabab se Is waaste Makkah bhi hai qurban-e-Madinah


Hota hai falak ka sar-e-tasleem yahan kham Allah re bulandi teri aiwan-e-Madinah


Aate hain sar-e-ajz jhukaye hue lakhon Shahan-e-jahan pesh-e-gadayan-e-Madinah


Bulbul kabhi bhoole se na le naam chaman ka Dekha hi nahi usne gulistan-e-Madinah


Lakhon ne lagaye hain tere koocha mein bistar Thodi si jagah hum ko bhi ae jaan-e-Madinah


Pohncha de tu mehboob ke dar par mujhe Ya Rab Le jaaun na duniya se main arman-e-Madinah


Samjhun ga hui Eid mubarak mujhe jis dam Ho jaye ga yeh sar mera qurban-e-Madinah


Itrati hai kyun baad-e-saba tu mere aage Dekhein ge kabhi hum bhi gulistan-e-Madinah


Sar de ke ghulaman-e-Nabi rah-e-Khuda mein Aaram se soye tah-e-daman-e-Madinah


Shahan-e-jahan kanpte hain naam se tere Allah yeh saulat teri Sultan-e-Madinah


Kya wasf karoon khoobi-e-akhlaq ka un ke Be-misl hai duniya mein har insaan-e-Madinah


Sar sabz kisi ki bhi na ho kisht-e-tamanna Barse na agar khalq pe neysan-e-Madinah


Makhlooq-e-Khudawand hai sab zer-e-hukumat Hai hakim-e-kaunain Sulaiman-e-Madinah


Aaram se thahrata hai zawwar-e-Nabi ko Goya ke yeh chhota sa hai ehsan-e-Madinah


Pesh aate hain rehmat ke farishte batawazu Allah ke mehman hain mehman-e-Madinah


Ho jaye jo Sarkar ki rehmat ka ishara Sag apna banaye mujhe darban-e-Madinah


Marne pe bhi chhorein ge na mehboob ka koocha Ushaaq ki jannat hai bayaban-e-Madinah


Ghabrayein ge sab mehr-e-qayamat ki tapish se Be-khauf magar hon ge gadayan-e-Madinah


Sibtain ki jab hashr mein aaye gi sawari Ghull hoga ke woh aate hain khuban-e-Madinah


Hai arz-e-Jameel Qadri ka yeh khulasa Lasha ho mera aur bayaban-e-Madinah


Ushaaq yeh kehte hain Jameel Qadri ko Hai naghma sara bulbul-e-bostan-e-Madinah

No Internet? No Problem! Get the App for Offline Lyrics!

Get it on Google Play

midhah-logo-grey© 2026 Midhah