Kyunkar Na Ho Makke Se

کیونکر نہ ہو مکے سے سوا شانِ مَدینہ وہ جبکہ ہوا مسکنِ سلطانِ مَدینہ

مَکے کو شرف ہے تو مَدینے کے سبب سے اس واسطے مکہ بھی ہے قربانِ مَدینہ

ہوتا ہے فلک کا سرِ تسلیم یہاں خم اللہ رے بلندی تری ایوانِ مَدینہ

آتے ہیں سرِ عجز جھکائے ہوئے لاکھوں شاہانِ جہاں پیشِ گدایانِ مَدینہ

بلبل کبھی بھولے سے نہ لے نام چمن کا دیکھا ہی نہیں اس نے گلستانِ مَدینہ

لاکھوں نے لگائے ہیں ترے کوچہ میں بستر تھوڑی سی جگہ ہم کو بھی اے جانِ مَدینہ

پہنچا دے تو محبوب کے دَر پر مجھے یارب لے جاؤں نہ دنیا سے میں اَرمانِ مَدینہ

سمجھوں گا ہوئی عید مبارک مجھے جس دم ہوجائے گا یہ سر مرا قربانِ مَدینہ

اِتراتی ہے کیوں بادِ صبا تو مرے آگے دیکھیں گے کبھی ہم بھی گلستانِ مَدینہ

سر دے کے غلامانِ نبی راہِ خدا میں آرام سے سوئے تہِ دامانِ مَدینہ

شاہانِ جہاں کانپتے ہیں نام سے تیرے اللہ یہ صولت تری سلطانِ مَدینہ

کیا وَصف کروں خوبیٔ اَخلاق کا اُن کے بے مثل ہے دنیا میں ہر اِنسانِ مَدینہ

Find Your Favorite Lyrics Anytime, Anywhere - Install the App Today!

سر سبز کسی کی بھی نہ ہو کشتِ تمنا برسے نہ اگر خلق پہ نیسانِ مَدینہ

مخلوقِ خداوند ہے سب زیرِ حکومت ہے حاکمِ کونین سلیمانِ مَدینہ

آرام سے ٹھہراتا ہے زَوَّارِ نبی کو گویا کہ یہ چھوٹا سا ہے احسانِ مَدینہ

پیش آتے ہیں رحمت کے فرشتے بتواضع اللہ کے مہمان ہیں مہمانِ مَدینہ

ہوجائے جو سرکار کی رحمت کا اِشارہ سگ اپنا بنائیں مجھے دَربانِ مَدینہ

مرنے پہ بھی چھوڑیں گے نہ محبوب کا کوچہ عشاق کی جنت ہے بیابانِ مَدینہ

گھبرائیں گے سب مہر قیامت کی تپش سے بے خوف مگر ہوں گے گدایانِ مَدینہ

سبطین کی جب حشر میں آئے گی سواری غُل ہوگا کہ وہ آتے ہیں خوبانِ مَدینہ

ہے عرضِ جمیلؔ رضوی کا یہ خلاصہ لاشہ ہو مرا اور بیابانِ مَدینہ

عشاق یہ کہتے ہیں جمیلؔ رضوی کو ہے نغمہ سرا بلبل بستانِ مَدینہ