Kya Muzdah e Jaan Bakhsh

Kya muzdah-e-jaan bakhsh sunaye ga qalam aaj Kaghaz pe jo sau naaz se rakhta hai qadam aaj

Aamad hai yeh kis badshah-e-arsh-e-makan ki Aate hain falak se jo haseenan-e-Iram aaj

Kis gul ki hai aamad ke khizan deedah chaman mein Aata hai nazar naqshah-e-gulzar-e-Iram aaj

Nazranah mein sar dene ko hazir hai zamanah Is bazm mein kis shah ke aate hain qadam aaj

Baadal se jo rahmat ke sar-e-shaam ghire hain Barse ga magar subh ko baran-e-karam aaj

Kis chand ki phaili hai ziya kya yeh saman hai Har baam pe hai jalwah numa noor-e-qadam aaj

Offline Lyrics Anytime, Anywhere - Download the App Today!

Khulta nahin kis jaan-e-masiha ki hai aamad But bolte hain qalib-e-be-jaan mein hai dam aaj

But khanon mein woh qahr ka kahram para hai Mil mil ke gale rote hain kuffar-o-sanam aaj

Ka'bah ka hai naghma ke hua laus se main paak But nikle ke aaye mere maalik ke qadam aaj

Tasleem mein sar wajd mein dil muntazir aankhein Kis phool ke mushtaq hain murghan-e-haram aaj

Aye kufr jhuka sar woh shah-e-but shikan aaya Gardan hai teri dam mein teh-e-tegh-e-do dam aaj

Kuch ra'b-e-shahanshah hai kuch walwalah-e-shauq Hai tarfah kashakash mein dil-e-bait-o-haram aaj

Purnoor jo zulmat kadah-e-dahr hua hai Roshan hai ke aata hai woh mahtab-e-karam aaj

Zahir hai ke Sultan-e-Do Aalam ki hai aamad Ka'bah pe hua nasb jo yeh sabz alam aaj

Gar aalam-e-hasti mein woh mah-e-jalwah fagan hai To saayah ke jalwah pe fida ahl-e-'adam aaj

Haan mufliso khush ho ke mila daman-e-daulat Tardamino muzdah woh utha abr-e-karam aaj

Ta'zeem ko uthe hain malak tum bhi khare ho Paida huye Sultan-e-Arab Shah-e-'Ajam aaj

Kal naar-e-jahannam se Hassan amno amaan ho Is maalik-e-firdaus pe sadqe hon jo hum aaj