Kya Khudadad Aap Ki

Kya Khuda-daad aap ki imdad hai Ik nazar mein shaad har naashaad hai

Mustafa ﷺ to barsar-e-imdad hai Afu to keh kya tera irshad hai

Ban padi hai nafs-e-kafir kesh ki Khel bigra lo khabar faryad hai

Is qadar hum un ko bhoole haye haye Har ghari jin ko hamari yaad hai

Nafs-e-ammarah ke hathon aye huzoor Daad hai bedaad hai faryad hai

Phir chali baad-e-mukhalif lo khabar Naao phir chakra gayi faryad hai

Khel bigra naao tooti main chala Aye mere wali bacha faryad hai

Raat andheri mein akela yeh ghata Aye Qamar ho jalwa-gar faryad hai

Ehad jo un se kiya roz-e-alast Kyun dil-e-ghafil tujhe kuch yaad hai

Main hoon main hoon apni ummat ke liye Kya hi pyara pyara yeh irshad hai

Woh shafa'at ko chale hain pesh-e-Haq Aasiyo tum ko mubarakbad hai

Find Your Favorite Lyrics Anytime, Anywhere - Install the App Today!

Kaun se dil mein nahin yaad-e-habib Qalb-e-momin Mustafa ﷺ abad hai

Jis ko us dar ki ghulami mil gayi Woh gham-e-konain se azaad hai

Jin ke hum bande wahi thehre shafi Phir dil-e-betab kyun naashaad hai

Un ke dar par gir ke phir utha na jaye Jaan-o-dil qurban kya uftaad hai

Yeh ibadat zahido be-hubb-e-dost Muft ki mehnat hai sab barbad hai

Hum safeeron se milein kyunkar Hasan Sakht qaid aur sang-dil sayyad hai