Kon Kehta Hai Ke Zeenat

Kaun kehta hai ke zeenat-e-khuld ki achi nahi Lekin ae dil furqat-e-kue-Nabi achi nahi

Reham ki Sarkar mein pursish hai aison ki bohat Ae dil acha hai agar halat meri achi nahi

Teera dil ko jalwa-e-mah-e-Arab darkar hai Chaudhvin ke chand teri chandni achi nahi

Kuch khabar hai main bura hoon kaise ache ka bura Mujh bure pe zahido ta’ana-zani achi nahi

Us gali se door reh kar kya marein hum kya jiyein Aah aisi maut aisi zindagi achi nahi

Un ke dar ki bheek chorein sarwari ke waste Un ke dar ki bheek achi sarwari achi nahi

Khak un ke aastane ki manga de charagar Fikr kya halat agar bimar ki achi nahi

Instant Access to Thousands of Lyrics - Tap to Install!

Saya-e-deewar-e-janan mein ho bistar khak par Arzoo-e-taj-o-takht-e-khusravi achi nahi

Dard-e-isyan ki taraqqi se hua hoon jaan-ba-lab Mujh ko acha kijiye halat meri achi nahi

Zarra-e-Taiba ki talat ke muqabil ae Qamar Ghat-ti barhti char din ki chandni achi nahi

Mausam-e-gul kyun dikhaye jate hain ye sabz bagh Dasht-e-Taiba jayenge hum rah-zani achi nahi

Bekason par meharban hai rehmat-e-bekas-nawaz Kaun kehta hai hamari bekasi achi nahi

Banda-e-Sarkar ho phir kar Khuda ki bandagi Warna ae bande Khuda ki bandagi achi nahi

Rusiyah hoon munh ujala kar de ae Taiba ke chand Is andhere pakha ki ye teeragi achi nahi

Khaar haye dasht-e-Taiba chubh gaye dil mein mere Aariz-e-gul ki bahar-e-arzi achi nahi

Subh-e-mahshar chaunk ae dil jalwa-e-mehboob dekh Noor ka tarka hai pyare kahili achi nahi

Un ke dar par maut aa jaye to ji jaaun Hassan ؔ Un ke dar se door reh kar zindagi achi nahi