Kiya Hi Zauq Afza

Kya hi zauq afza shafa'at hai tumhari wah wah Qarz leti hai gunah parhezgari wah wah

Khama-e-qudrat ka husn-e-dastkari wah wah Kya hi tasveer apne pyare ki sanwari wah wah

Ashk shab bhar intezar-e-afw-e-ummat mein bahein Main fida chand aur yun akhtar shumari wah wah

Instant Access to Thousands of Lyrics - Tap to Install!

Ungliyan hain faiz par toote hain pyase jhoom kar Nadiyan Punjab-e-rehmat ki hain jaari wah wah

Noor ki khairaat lene daudte hain mehr-o-maah Uthti hai kis shaan se gard-e-sawari wah wah

Neem jalway ki na taab aaye qamar saan to sahi Mehr aur un talwon ki aaina daari wah wah

Nafs yeh kya zulm hai jab dekho taza jurm hai Natwan ke sar par itna bojh bhaari wah wah

Mujrimon ko dhoondti phirti hai rehmat ki nigah Tale-e-bargashta teri saazgari wah wah

Arz beghi hai shafa'at afw ki sarkar mein Chhant rahi hai mujrimon ki fard saari wah wah

Kya Madinah se saba aayi ke phoolon mein hai aaj Kuch nayi bu bhini bhini pyari pyari wah wah

Khud rahe parde mein aur aaina aks-e-khaas ka Bhej kar anjaanon se ki raah daari wah wah

Is taraf rauzay ka noor us samt mimbar ki bahaar Beech mein jannat ki pyari pyari kyari wah wah

Sadqe is inaam ke qurban is ikraam ke Ho rahi hai donon aalam mein tumhari wah wah

Para-e-dil bhi na nikla dil se tohfay mein Raza Un sagan-e-ko se itni jaan pyari wah wah