Kisi Se Mumkin Hai Sift

Kis se mumkin hai sifat Hazrat-e-Rasool-e-Allah ki Jab ke Khaliq khud kare midhat-e-Rasool-e-Allah ki

Man ra'ani qad ra-al-Haq ke jalwon par nisar Hai bila-shak deed-e-Haq ru'iyat-e-Rasool-e-Allah ki

Yun to un ki aam rahmat se koi khaali nahi Mominon par khaas hai rahmat-e-Rasool-e-Allah ki

Le gaye tashreef jis koocha se Shah-e-Mursalaan Us gali mein bas gayi nikh-hat-e-Rasool-e-Allah ki

No More Screenshots! Save Storage with Our Lyrics App!

Raah bhatkein kis liye joya-e-Mehboob-e-Khuda Rahbar-e-ushaq hai nikh-hat-e-Rasool-e-Allah ki

Daman-e-umeed bhar kar kyon na layein namuraad Pherna khaali nahi aadat-e-Rasool-e-Allah ki

Janwar sang-o-shajar ins-o-malak arsh-o-falak Jaante hain jaisi hai qudrat-e-Rasool-e-Allah ki

Us ko lautaya to ek eema se us ke do kiye Mehr-o-mah se puchiye taqat-e-Rasool-e-Allah ki

Wah-wah zor-e-Yadullahi ke musht-e-khaak se Chha gayi kuffar par haibat-e-Rasool-e-Allah ki

Sab farishton mein unhein is waste afzal kiya Karte the Rooh-ul-Amin khidmat-e-Rasool-e-Allah ki

Jama honge roz-e-mahshar awwalin-o-aakhireen Aur dikhayi jaye gi izzat-e-Rasool-e-Allah ki

Hum bhikari bhool jayenge masaib-e-hashr ke Dekh lenge jis ghadi surat-e-Rasool-e-Allah ki

Ik akeli jaan khud masoom fikr-e-do-jahan Marhaba sad marhaba himmat-e-Rasool-e-Allah ki

Anbiya-o-Awliya-o-awwalin-o-aakhireen Kaun hai jis ko nahi haajat-e-Rasool-e-Allah ki

Aye zahe rahmat siyah-karan-e-ummat ke liye Ho gayi aarasta jannat-e-Rasool-e-Allah ki

Dawar-e-mahshar baroz-e-hashr yun farmaye ga Jaye pehle khuld mein ummat-e-Rasool-e-Allah ki

Ahl-e-mahshar ki nazar un ki taraf ko kyon na ho Dekhta hai khud Khuda surat-e-Rasool-e-Allah ki

Us ko haasil ho gaya qurb-e-Khuda ka martaba Jis ke haath aayi yahan sohbat-e-Rasool-e-Allah ki

Khatm kardi jaan nisari Hazrat-e-Siddiq ne Jab ke Makkah se hui hijrat-e-Rasool-e-Allah ki

Qurb duniya mein tha is sarkar se Siddiq ka Baad-e-rihlat bhi rahi qurbat-e-Rasool-e-Allah ki

Aye ghulam-e-chaar yaar-o-ba-safa-o-Ghawth-e-Pak Hai himayat par teri itrat-e-Rasool-e-Allah ki

Raasta pucho Nujoom-e-Mustafa se gum raho Aur safeena Nooh ka itrat-e-Rasool-e-Allah ki

Hain isi halat se zinda jis tarah duniya mein the Zahiri surat se thi rihlat-e-Rasool-e-Allah ki

Aarzoein dil ki karti hain dua Allah se Hum bhi dekhenge kabhi turbat-e-Rasool-e-Allah ki

Aate hain lakhon malak jis ki ziyarat ko unhein Jaan-e-momin kahiye ya turbat-e-Rasool-e-Allah ki

Pesh-e-minbar kharij-e-masjid azan-e-khutba ho Hai musalmano yehi sunnat-e-Rasool-e-Allah ki

Dekh lo aye Najdiyo waq'at-e-Rasool-e-Allah ki Arsh-e-Aazam par hui dawat-e-Rasool-e-Allah ki

Dhal gaye saanche mein Abu-Jahl-e-la'een ke jo quloob Kya nazar aaye unhein qudrat-e-Rasool-e-Allah ki

Dil ke andho Najdiyo duniya mein jo chaho kaho Hashr ke din dekhna izzat-e-Rasool-e-Allah ki

Jhonk de gi naar mein tanqees-e-shan-e-Mustafa Khuld mein le jaye gi ulfat-e-Rasool-e-Allah ki

Ilm-e-Maula se barhaya ilm-e-shaitan-e-la'een Us pe da'wa ye ke hon ummat-e-Rasool-e-Allah ki

Munkir-e-ilm-e-Nabi ke waste naar-e-jaheem Aur ghulamon ke liye jannat-e-Rasool-e-Allah ki

Kardiya tera laqab Murshid ne Maddah-ul-Habib Kar Jameel Qadri midhat-e-Rasool-e-Allah ki