Khudawand e Jahan Jab Khud

Khudawand-e-jahan jab khud hai pyara teri surat ka To aalam kyun na ho banda tere husn-o-malahat ka

Sharaf hasil hua Sarkar tum se jis ko bai'at ka Usay muzdah mila Haq se dukhool-e-qasr-e-jannat ka

Jo khaali haath aatay hain muradein le ke jatay hain Tumhare dar pe ik mela laga hai ahl-e-hajat ka

Jo haath utha hua hai saari khilqat ka teri jaanib Batata hai ke tu Qasim hai Rab ki jumla ne'amat ka

Zameen se arsh tak goonje do aalam par gayi halchal Baja Kaaba mein naqara jo Sultan-e-Risalat ka

Kahin sehra mein mauj aayi kahin darya mein gard uthi Kahin but ho gaye oundhay ajab aalam tha shaukat ka

Buton ko poojne walay banay dam mein Khuda walay Zaban-e-paak se jis dam suna da'wa-e-nubuwwat ka

Khuda ke naam ko phaila diya saaray zamana mein Macha tha shor duniya mein bohat shirk-o-zalalat ka

Woh apni roshni se jagmaga deta hai duniya ko Qamar par ek parto par gaya tha un ki tal'at ka

Tu woh pyara Khuda ka hai ke pyaray tere sadqay mein Hua sab ummaton se fazl barh kar teri ummat ka

Isi umeed par hai zindagi ushshaq-e-Hazrat ki Kabhi to umr mein hoga nazara un ki turbat ka

Mera dil hai Madinay mein Madina mere dil mein hai Khucha seena mein hai naqsha Habib-e-Haq ki turbat ka

Karay gar istighasa aap ke dar par na yeh banda To phir kis ko sunaye ja ke afsana museebat ka

Tumhare gesu-e-mushkeen ki kuch aisi ghata chaye Baras jaye Khudara hum pe jhala abr-e-rehmat ka

Yeh be-khatkay gunahgaron ka dakhil khuld mein hona Karishma hai Rasoolullah ki chashm-e-inayat ka

Gunahgaro chalo doro ke waqt aaya shafa'at ka Woh khola Naib-e-Rehman ne darwaza jannat ka

Isharay se qamar ke do kiye suraj ko lautaya Zameen se aasman tak shor hai Maula ki taqat ka

Ta'alallahu bi-hukm-e-Haq farishtay charkh se aakar Tamasha dekhte thay jang mein Maula ki taqat ka

Woh hai zor-e-Yadullahi ke hamsar dono aalam mein Na koi un ki quwwat ka na koi un ki taqat ka

Offline Lyrics Anytime, Anywhere - Download the App Today!

Rahay ga roz-e-afzoon aap ka shohra qayamat mein Balaghat ka fasahat ka shuja'at ka sakhawat ka

Ghazal ik aur bhi parh aye Jameel-e-Qadri Rizvi Ke tujh par faiz hai Ahmed Raza peer-e-tariqat ka