Khuda Ka Woh Akhri Payambar

Khuda ka woh aakhri payambar Khada hai Faran ki chotiyon par

Jo deen-e-Islam le ke aaya Khuda ka paigham le ke aaya

Nigah sab ki hai jis ki janib Jo ahl-e-Makkah se hai mukhatib Tumhari nazron ke samne hai Tamam logon ke samne hai

Find Your Favorite Lyrics Anytime, Anywhere - Install the App Today!

Mira har ik lamha zindagi ka Kabhi dukhaya hai dil kisi ka?

Kaho kabhi main ne jhoot bola Kabhi khayanat ka zehar ghola

To sab pukare nahi Muhammad ﷺ Ke tum ho Sadiq, Ameen Muhammad ﷺ

Kaha ye phir Shah-e-Dosara ne Nabi banaya mujhe Khuda ne

Usi ki deta hoon main shahadat Ye jaan lo layiq-e-ibadat

Koi Khuda ke siwa nahi hai Ye but ye patthar Khuda nahi hai Suna jo elan-e-Mustafai Sama'at-e-kufr talmalai

Abhi jo taeed kar rahe the Huzoor ka dam jo bhar rahe the

Bhadak uthe haq ki baat sun kar Pahar se sab ne sang chun kar

Muhammad Mustafa ko maare Sitam ne patthar wafa ko maare

Lahu mein apne nahate Aqa Rahi dua go sada-e-Aqa

Wahi sada door door pahunchi Barah-e-taht-ush-shaoor pahunchi

Usi sada se woh noor phoota Naseeb-e-jahl-o-ghuroor phoota

Usi sada se zameer chamke Jale isi se diye haram ke

Wahi sada ilm ka Madinah Rah-e-amal, irtaqa ka zeena

Tamam Quran wahi sada hai Urooj-e-insan wahi sada hai

Zamana reh jaye tum se peeche Chale chalo us sada ke peeche