Humare Sar Pe Hai Saya

Hamare sar pe hai saya-fagan rehmat Muhammad ki Hamare dil mein hai jalwa-kunan surat Muhammad ki

Gawara hi nahi ushshaq ko furqat Muhammad ki Rahe dono jahan mein Ya Khuda qurbat Muhammad ki

Zahe qismat ishara pa ke unki chashm-e-rehmat ka Ghulamon ko lubha kar le chali jannat Muhammad ki

Nabi ke naam lewa aane wale hain thake haare Sajayi jaati hai is waaste jannat Muhammad ki

Gunaahgaro na ghabrao siyah-karo na sharmao Woh aayi mujrimon ko dhoondti rehmat Muhammad ki

Aghithni Ya Rasool Allah ke naare hain mehshar mein Rafa'na keh raha hai dekh lo rehmat Muhammad ki

Fida jaan-e-jahan fikr-e-do-aalam aur akela dam Isay kehte hain chahat aur yeh hai himmat Muhammad ki

Malaik rokte hain is liye auron ko jannat se Ke layi jaaye pehle khuld mein ummat Muhammad ki

Arab wala chala hai bakhshwane apni ummat ko Machi hai saare khaas-o-aam mein shohrat Muhammad ki

Kisay maloom hai woh jaanein ya unka Khuda jaane Jo hai dargah-e-Haq mein izzat-o-wa'qat Muhammad ki

Uloom-e-awwaleen-o-aakhareen ka kar diya maalik Khuda ne dhoom se ki Arsh par dawat Muhammad ki

Rasaai ho nahi sakti wahan tak aql-e-aalam ki Huzoor-e-Haq hai jitni manzilat wa'qat Muhammad ki

Ishare se qamar ke do kiye sooraj ko lautaya Zamane mein hai ashar taqat-o-qudrat Muhammad ki

Batata hai yeh farman-e-Huwal Mu'ti Ana al-Qasim Bategi hashar tak kaunain mein ne'mat Muhammad ki

Faqiro be-nawa'o maang lo jo kuch zaroorat ho Jhirakna pherna khaali nahi aadat Muhammad ki

Azal mein ne'matein taqseem keen jab Haq Ta'ala ne Likhi Jibreel ki taqdeer mein khidmat Muhammad ki

Farish-to qabr mein apni sanad hamrah laya hoon Yeh dekho dil ke aaina mein hai surat Muhammad ki

Fida kyonkar na ho jaan-e-jahan is sabz gumbad par Ke is mein hai saji pyaari dulhan turbat Muhammad ki

Hazaron qudsiyon ki bheed hai rozay ki jaali par Hazaron aa rahe hain choomne turbat Muhammad ki

Ajal jaldi na kar itni Madine aa hi pohanche hain Khudara dekh lene de hamein turbat Muhammad ki

Khilaf-e-Ahle-Sunnat sainkron mazhab hue paida Magar ghalib hai sab adyaan par millat Muhammad ki

Get Lyrics On-The-Go! Download Our App Now!

Abu-Jahli kahe bid'at-o-lekin zikr-e-maulid se Dilon mein aashiqon ke barhti hai ulfat Muhammad ki

Isay bid'at samajhta hai to kyon aata hai mehfil mein Hamein to kheench laati hai yahan ulfat Muhammad ki

Qayam-e-zikr-e-maulid mein khade hote hain munkir bhi Yeh hai is zikr ki rif'at yeh hai shaukat Muhammad ki

Jameel-e-Qadri Rizvi tujhay kyon khauf-e-mehshar ho Ke tere dil ke aainay mein hai surat Muhammad ki