Humare Sar Pe Hai Saya

ہمارے سر پہ ہے سایہ فگن رحمت محمد کی ہمارے دل میں ہے جلوہ کناں صورت محمد کی

گوارا ہی نہیں عشاق کو فرقت محمد کی رہے دونوں جہاں میں یاخدا قربت محمد کی

زہے قسمت اِشارہ پا کے اُن کی چشمِ رحمت کا غلاموں کو لبھا کر لے چلی جنت محمد کی

نبی کے نام لیوا آنے والے ہیں تھکے ہارے سجائی جاتی ہے اس واسطے جنت محمد کی

گنہگارو نہ گھبراؤ سیہ کارو نہ شرماؤ وہ آئی مجرموں کو ڈُھونڈتی رحمت محمد کی

اَغِثْنِیْ یَارَسُوْلَ اللہ کے نعرے ہیں محشر میں رَفَعْنَا کہہ رہا ہے دیکھ لو رحمت محمد کی

فدا جانِ جہاں فکر دوعالم اور اکیلا دم اسے کہتے ہیں چاہت اور یہ ہے ہمت محمد کی

ملائک روکتے ہیں اس لیے اَوروں کو جنت سے کہ لائی جائے پہلے خلد میں اُمت محمد کی

عرب والا چلا ہے بخشوانے اپنی اُمت کو مچی ہے سارے خاص و عام میں شہرت محمد کی

کسے معلوم ہے وہ جانیں یا ان کا خدا جانے جو ہے درگاہِ حق میں عزت و وَقعت محمد کی

علومِ اَولین و آخریں کا کردیا مالک خدا نے دُھوم سے کی عرش پر دعوت محمد کی

رَسائی ہو نہیں سکتی وہاں تک عقلِ عالم کی حضورِ حق ہے جتنی منزلت وَقعت محمد کی

اِشارے سے قمر کے دو کیے سورج کو لوٹایا زمانے میں ہے اَشہر طاقت و قدرت محمد کی

بتاتا ہے یہ فرمانِ ھُوَ الْمُعْطِیْ اَنَا الْقَاسِم بٹے گی حشر تک کونین میں نعمت محمد کی

فقیرو بے نواؤ مانگ لو جو کچھ ضرورت ہو جھڑکنا پھیرنا خالی نہیں عادت محمد کی

اَزَل میں نعمتیں تقسیم کیں جب حق تعالیٰ نے لکھی جبریل کی تقدیر میں خدمت محمد کی

فرشتو قبر میں اپنی سند ہمراہ لایا ہوں یہ دیکھو دِل کے آئینہ میں ہے صورت محمد کی

فدا کیونکر نہ ہو جانِ جہاں اس سبز گنبد پر کہ اس میں ہے سجی پیاری دلہن تربت محمد کی

ہزاروں قدسیوں کی بھیڑ ہے روضے کی جالی پر ہزاروں آرہے ہیں چومنے تربت محمد کی

اَجل جلدی نہ کر اتنی مَدینے آ ہی پہنچے ہیں خدارا دیکھ لینے دے ہمیں تربت محمد کی

خلافِ اَہلسنّت سینکڑوں مذہب ہوئے پیدا مگر غالب ہے سب اَدیان پر ملت محمد کی

ابوجہلی کہے بدعت و لیکن ذِکرِ مولد سے دلوں میں عاشقوں کے بڑھتی ہے اُلفت محمد کی

اسے بدعت سمجھتا ہے تو کیوں آتا ہے محفل میں ہمیں تو کھینچ لاتی ہے یہاں اُلفت محمد کی

قیامِ ذِکر مولد میں کھڑے ہوتے ہیں منکر بھی یہ ہے اس ذِکر کی رِفعت یہ ہے شوکت محمد کی

جمیلِؔ قادری رضوی تجھے کیوں خوفِ محشر ہو کہ تیرے دل کے آئینے میں ہے صورت محمد کی